拍劇出事心諗就咁埋單？鄭敬基碌落樓梯 死神又擦身！
現年54歲的歌手鄭敬基（Joe）再次被死神召喚！拍攝一場被捉的搞笑戲時，竟然由喜變悲，他突然雙腳朝天碌落樓梯，Joe在經歷生死十幾秒間，腦中突閃過墮台身亡的黃家駒，心諗：「今次就咁埋單？」不過，傷腰的他與太太更親密恩愛，笑言：「唔知第二時仲得唔得！」
昨日網上流出一條鄭敬基拍攝無綫新劇《棟仁的時光》意外受傷的短片，在短短的11秒視頻中，Joe在類似工廠大廈後樓梯逃跑時，被一名男子從後箍實，他不停掙扎，成功揈開對方，但疑差錯腳失重心墮後，兩腳朝天碌落樓梯，被Joe揈開的男子一度欲衝落樓梯，卻被身邊的木梯撼頭，另兩男表現緊張撲前，氣氛相當緊張。
短短幾秒驚斷頸癱瘓
記者昨日致電Joe時，他直認早前拍劇遇上意外，撻生魚般碌落十幾級樓梯再癱在地上：「當日拍一場喺後樓梯被飾演保安員嘅張漢斌捉住，我再被身邊木梯上嘅油漆照頭淋，試過三、四次位都冇事，但到第五次試拍時，可能木梯嘅位置移動過，我一轉身想挨埋牆卻挨中空氣，結果就碌落樓。」碌落樓梯雖然短短幾秒，但Joe感覺漫長：「嗰時我諗啲樓梯級好硬，會唔會撼斷條頸變成半身癱瘓？我又諗起我哋好愛嘅Beyond成員黃家駒，佢玩遊戲咋喎咁就去咗！又諗起同老婆啱啱慶祝完結婚一周年，上年有心臟病要做通波仔手術，唔通呢次就咁埋單？點知一碌落去，撞咗一下樓梯，我再跌落地，嗰刻自然反應係想趷起身，但十幾個工作人員叫我唔好郁、深呼吸，問我有冇事，但我真係冇事喎，立即彈番起身。」
冇暈冇嘔唔肯睇醫生
他憶述碌落樓梯時沒有任何痛楚感覺，只是腰部似被撞親有點痠痛，當時無綫導演及工作人員比他更緊張，不停問可需要入院，但Joe覺得頭頸沒有受傷，又沒有頭暈作嘔，加上考慮到袁偉豪要趕拍《再創世紀》，遂堅持完成之後的兩場戲才收工。今次意外，Joe沒有向無綫Claim保險，事發後他曾回事發的後樓梯祈禱感謝上帝關護他。問到太太Angie是否很擔心？Joe表示回家後才告知太太遇意外，大讚她處事冷靜，還幫他捽藥酒：「係條腰紅腫咗一大撻，身體其他部分冇傷痕。」
不過，事發個多月，Joe仍未睇醫生或入院檢查，他哈哈笑說：「都會睇吓、檢查吓，我都知我唔係特技人只係歌手，我一啲功夫都唔識，如果識我做咗錢嘉樂！」現時腰還有少少拉傷的痛楚，但沒有影響夫妻間的生活，他還搞笑說：「我同太太仲親密咗，因為唔知第二時仲得唔得！」不過他坦言對動作戲有陰影，之前到馬來西亞和高海寧拍電影，亦明言曾受傷，不能再拍有危險動作的戲。
生命脆弱憑歌寄意
其實去年6月再婚不久的Joe，發現心臟有條血管栓塞九成隨時會猝死，要即時入院做「介入性心導管手術」，現拍戲又遇意外，可算是兩度死裏逃生，令他體會到生命原來很脆弱：「可能第二日，我死咗就見唔到老婆同仔女，所以有乜嘢心願，唔好等要盡快做。」又說今次一跌，令他要放信仰、家人在第一位：「入行30年，有15年冇出新歌，本來我冇諗住咁快就推出呢首《說不盡情話》，但呢首歌內容正正係反映到人生起落，生死無常，我特別將呢首歌送畀太太，獻畀陪我一起成長嘅歌迷，互勉珍惜眼前人。」
文：音樂組
|
鍾意就快D Share啦！
|
|
|
