眨下眼，11月19日，無綫台慶又到。年年都係咁啦，將一啲舊橋重重複複用完又用，冷飯炒熱再攤番凍，令觀眾由唔識笑到真係忍唔住笑。
節目內容吸引力不再，但大家對「數人頭」呢個遊戲就樂此不疲。其實有路可捉嘅，台慶亮燈通常都冇咩鎮台之寶喺度，節目巡禮就多啲，因為有廣告商在場，製造不少商機。至於台慶………比較難估。台慶頒獎禮就一定星光熠熠嘅。
講番難估呢個問題，何止觀眾估佢唔到，就連受邀請嘅嘉賓，都估唔到自己呢頭獲貴賓式邀請，又話出埋機票住宿，嗰頭俾人彈鐘，仲要係嗰個係三屆視帝，兼無綫首位視帝羅嘉良。
已經北上搵人仔多年、再婚娶埋大陸演員妻子仲生咗個女嘅羅嘉良，早前都有返無綫幫手拍下「帶人劇」《與諜同謀》，做襯托鄭俊弘嘅角色，今次亦係羅嘉良闊別娘家八年之後再效力。
上個月，無綫開始傾台慶夜嘉賓名單，周刊報道指會上不少人提出邀請羅嘉良，仲諗咗好多環節俾佢做，例如分享下佢喺無綫嘅日子啦、chit chat啦、致敬環節啦咁，無綫亦已經聯絡咗佢，誠邀出席，仲話願意支付佢返港嘅機票同酒店費用。
羅嘉良亦係一個念舊嘅人，佢都話好懷念喺無綫成長嘅歲月，所以應承咗。但問題係，佢本來一早plan咗，本月中要去多倫多，同囝囝慶祝十八歲生日，所以一早向劇組請假，book晒機票。依家因為要出席台慶，羅嘉良就同囝囝講，希望囝囝可以體諒，可能要返香港一兩日，親子時間會少啲，囝囝都冇問題。
既然係咁，羅嘉良就著手改機票啦，成個行程改晒schedule，並通知無綫。呢個時候無綫覆返佢話：唔使喇，你唔使返嚟喇。
羅嘉良竟然俾人彈鐘？黑人問號。
周刊向羅嘉良了解事件，佢承認當幾乎辦好晒機票酒店準備返港之際，無綫突然同佢講，話唔使佢返嚟。至於是否因為budget嘅問題，羅嘉良話「佢哋係咁講」，但亦不排除係其他原因。訪問中，羅嘉良顯得大惑不解，未至於激動嬲豬，但失望一定有。他稱，依家嘅無綫，令他感到陌生。而同樣的事情，以前係唔會發生。羅嘉良謂感到十分心痛，唔明白點解自己成長嘅公司會變成咁。
最奇怪係，無綫之前邀請羅嘉良嗰陣，講明願意支付機票及酒店錢；但當羅嘉良改行程，報埋價之後，無綫又話根本冇預呢個支出。咁可能就係，無綫最初一心諗住係俾羅嘉良由浙江橫店返港嘅機票錢，而冇諗過佢本來要去多倫多探仔。不過羅嘉良補充謂，取消原定機票、加埋返港機票及住宿，條數都係幾萬蚊，佢自己俾都冇問題，但問題係依家無綫叫佢唔使返嚟喇。
周刊聯絡過無綫助理總經理（非戲劇製作）余詠珊，她稱因為時間夾唔到，所以同羅嘉良今次合作唔成事。至於是否預算出問題，余詠珊話「應該唔係」。
更多娛聞，喺晒《娛果》
http://fb.com/appledailyent
|
鍾意就快D Share啦！
|
|
|