英皇集團老闆楊受成博士女兒楊玳詩因愛女曾患有羊癇症而一度崩潰，不斷進入醫院，令她更明白作為父母要比小朋友更堅強，更發起英皇證券集團慈善義賣活動，以過來人身份鼓勵及幫助有需要的人。
女兒患病令其崩潰
從事金融業的楊玳詩（Daisy）育有13歲女兒Meagan，予人女強人一面的她透露因女兒3歲至8歲幾時患有羊癇症，而晴天霹靂，Daisy說：「佢抽筋就冇咗知覺，一行就跌，係頭落地先，似熄咗機，要等幾分鐘先會醒，但只會微微笑，20分鐘先會回魂，佢唔知發生咩事，佢每月有十日會係咁。」Daisy講起當時情況亦眼濕濕：「佢3歲幾時抽筋撞咗埋枱角，下巴穿咗，成條毛巾都係血，去到醫院，醫生話撞力好大，連牙都歪，排牙直情要整容。佢病情嚴重到我都覺得自卑，當時我崩潰，呢條路唔易行，好痛苦，小朋友話畀你知頭痛，你會知頭痛會係點，但佢同你講抽筋，我都未試過，都唔知係要做啲乜，我攬住佢喺床，佢反晒眼，一路震又硬晒，根本冇嘢做得到。」她指當時進出醫院次數多到數不清，星期六、日親子活動就是去醫院試新藥。
女兒懂事
Daisy指女兒自小懂事，3歲開始去教堂，更會反安慰她：「當時佢捉住我隻手叫我唔使驚、唔使擔心，之後講耶穌故事畀我聽，佢覺得自己已經好好彩。佢知道自己有呢個病食糖，食一啖蛋糕就會抽筋，所以佢唔會食。」
飽受壓力冇人知
現今社會有不少怪獸家長，但對Daisy來說，她當時唯一的希望就是女兒身體健康：「我覺得上天冥冥之中有安排，如果我個女冇事，我或者係虎媽，我都想佢入名校，學鋼琴、小提琴、唱歌。不過我當時唯一希望佢身體健康，佢每日返到學我就好開心。」Daisy透露女兒讀幼稚園要工人攬住上堂而無朋友，直到一年班不可以有工人在課室，工人在門口望住女兒，小息扶女兒去廁所，令Daisy更覺自卑：「我唔想個女自卑，冇朋友，但當時校長話係我自卑，點解唔畀人知你個女有工人，咁佢真係唔舒服，校長仲要話畀學生知羊癇症係咩，如果身邊有同學咁樣要點做呀，最後變成一個教育。」她才恍然大悟。後來女兒9歲康復後Meagan轉為去勉勵其他小朋友，Daisy每次見到病童家長都會想起自己的經歷：「好多人都會攬小朋友叫佢唔好驚，但我係會攬住父母，叫佢哋唔好驚，父母壓力冇人知道，我感同身受。」Daisy希望藉自己經歷，以過來身人份去幫別人，要堅強面對逆境。
Toby做善事做到喊
楊玳詩（Daisy）已經是第三年發起英皇證券集團慈善義賣活動，今次找來藝人梁靖琪（Toby）合作，雖然二人一早已認識，但首度合體為慈善，Toby加入不少新概念，如親子造衫活動，Daisy更找容祖兒及張敬軒等畫T-shirt，希望今年籌得超過100萬，Toby說：「希望帶訊息畀下一代，因小朋友太易得到玩具同電話，我每次做慈善都好感動，都會喊。」活動由11月24至12月3日於淺水灣The Pulse舉行，受惠機構是「生命小戰士會」，部分善款捐給「香港導盲犬服務中心」。
|
鍾意就快D Share啦！
|
|
|