地盤佬不是天生地盤佬。早前一個地盤佬商場練琴的片段在網上瘋傳，大家讚鐵漢柔情真漢子，正能量爆錶！現在全港約有45萬註冊建築工人，不過當中一半已屆45至 ...
地盤佬不是天生地盤佬。早前一個地盤佬商場練琴的片段在網上瘋傳，大家讚鐵漢柔情真漢子，正能量爆錶！現在全港約有45萬註冊建築工人，不過當中一半已屆45至50歲，預計他們將於未來10至15年內退休。老一輩退役，新一輩心裏總有夢，有人一心想做運動員提倡運動，入行一邊操肌一邊賺本錢追夢。
在2008年，16歲的翁志龍（阿龍）在網上看到外國的街頭健身（Street Workout）片段，驚為天人。那時香港還沒多少人玩，心想「機會嚟喇！」發憤苦練，要成為「一講起街頭運動就諗起我」的人。17歲畢業，他自封「全職運動員」，除了每星期返一、兩天兼職，其餘時間早晚練肌兩次，每次三小時，風雨不改，「你發現，有些動作只要兩、三天不練習，就會跌watt，做得唔靚，前功盡廢。」除了血汗，最大代價是無錢，「當時月薪三、五千元，畀得好少家用，但放假一定要夠錢請到阿媽飲茶囉！」媽媽見他日日流連公園練肌，動作似「扮旗」，日哦夜哦。他在YouTube貼練習片段，公園做「人旗」，身上還坐個細路女，甚至抱住兩個孩子做抬腿，嚇死人的體能挑戰，在運動forum間瘋傳，漸漸有雜誌、傳媒訪問，家人開始明白他在做甚麼，默默支持。
2014年，在他操到最fit，想參加國際Street Workout賽事闖出名堂時，卻弄傷了肩，笑笑口的他突然細聲說：「講呢個會喊㗎喎！覺得努力全白費了，為何我辛苦努力了這麼久，到頭來甚麼都沒有。我連吊起自己身體都有困難，連好基本的動作都做唔到。」他常說想紅、想出名，每次一提起都氣聚丹田零舍有力。細個冇人理咩，咁想紅？他沉默了十秒，「我在農村長大，媽媽覺得你上電視，就是『嘩，光宗耀祖呀！』我好想達成這事，好想看媽媽攞住我段片同人講，『阿龍出現呀！』想她以我這個仔為榮。」
俾人鬧自尊心受損 有壓力就去健身
夢想的路突然崩塌，他不想也不會放棄的，回望五年來，女友同家人陪着他任性，他突然覺得不可以這樣。有甚麼工作可以練肌又好賺呢？紮鐵也！「做健身教練，要搵人、宣傳，初時無固定收入。做紮鐵人工高，可能做十日放廿日去做運動，一般都有萬五、六元了，追回錢及時間。估唔到紮鐵仲令我意志更堅定，你唔堅定點頂？街頭健身動作你不堅持完成不了。」
朋友說做地盤最辛苦是日日曬，卻開正阿龍嗰瓣，他最愛曬太陽！但朋友講漏了一個『暴』字：「係『暴曬』。我朝早8點至10點，已飲咗三支大樽水。每次飲水，判頭或前輩都望一望你，就有壓力。」辛苦的工作一定留給新仔做；粗口橫飛是地盤文化，但你能感受到話中的愛與詛咒，「成日俾人鬧，自尊心會受損的。有啲做兼職的廚房大佬，哪受得這種氣？地盤留不住人，這也是原因。」有壓力就跑去健身，或者轉換練肌模式，「有時某些動作對我運動的動作有幫助，我就好集中去做。走去戙鐵（把長鐵豎直），我個甫士可能有點誇張有點怪，但那動作運用了肩膊及背肌，對我做倒立掌上壓好有用。」
半年前，他暫時丟下工作，跑去上新開的「街頭健身教練課程」，正等待考證書，希望可以成為正式的健身教練。紮鐵，實實在在地承載着他的夢想，「我覺得紮鐵是一種認可，一種能力。你講自己做紮鐵，人們會覺得『這細路有料啊！』」但兩年來最大的損失是，肥咗，他一副往事如煙的表情遙望遠處，「真係好辛苦，有時放工好累，同工友食飯，叫燒腩仔、汽水，唔得喇我要食！」燒腩與碳酸化在嘴裏，是身體心靈的慰藉。現在他肩傷好了，要加倍努力收復失地。
記者：陳慧敏
攝影：Chan Long Hei/ATUM Images Justin Lun /ATUM Images
2017果籽繼續認真知味。識買惜用。行以求知。好事多為。重修舊好。
緊貼果籽報道，即like：http://fb.me/AS.AppleDaily
阿龍說體力勞動開正他嗰瓣，就是夏天太陽暴曬最難受。 
21歲的阿宗（上）是阿龍的徒弟，二人都在地盤打工儲錢，也一起考健身教練牌，將來做健身教練。