現年38歲嘅小雪（蔡雪敏）經歷兩段失敗婚姻，前年第三度結婚，嫁年紀比佢細四年嘅韓籍老公Robin Cheung，婚後定居澳州。日前小雪喺facebook上載同老公及一對仔女於飛機上嘅合照，並留言：「終於來到今天，心情既興奮又緊張，希望一切順利。」
原來噚日小雪同老公喺韓國補辦婚禮，小雪今日接受《蘋果》訪問話：「今次見老公屋企人唔緊張，大家一齊幾年，同佢屋企人都熟，同埋自己想好好享受呢個婚禮，唔只因為韓國婚禮，因為之前雖然經歴過兩段婚姻，但婚禮都係第一次。」
問及補辦婚禮係咪老公意思？小雪指前年註冊都計劃咗會搞：「因為要遷就好多嘢，又要就小朋友，今次本來去韓國探吓佢啲家人，就諗不如一次過搞埋啦!老公屋企人好錫我哋，同老公事前冇預備啲乜，都係佢屋企人打點晒，去到韓國都係試衫咁！」
小雪透露老公家人信奉基督教，因此婚禮以基督教儀式進行，牧師係老公嘅舅父，儀式同香港差唔多，要同雙方家長敬酒、長輩講祝賀說話，之後舉行自助餐婚宴，忙足一日，小雪着完婚紗又換上韓服，在婚禮上，小雪要用韓文宣誓，由於唔識韓文要臨時臨急讀，小雪都覺得自己講得好搞笑，好似講日文咁，小雪話：「仔女都好開心，着韓服又覺得好得意咁，又有其他小朋友一齊玩。」
講到小雪媽咪睇見到囡囡搵到幸福都好感動，喺婚禮喊，小雪話：「我都好感動，我都有喊，見到老公好錫我，好愛呢個家，又好尊重我屋企人，咁佢都好安慰。」不過小雪指媽咪唔識韓文，老爺奶奶又唔識中文，所以雙方家長都冇咩傾偈，小雪媽咪都唔介意覺得keep住笑就OK喇！
婚禮場地距離首爾約兩個幾鐘車程，小雪完成婚禮就由老公揸車載佢哋返首爾，佢同老公都好攰，但大家都好開心。
|
鍾意就快D Share啦！
|
|
|