《溏心風暴3》作為台慶劇嘅重頭戲，但口碑同收視都係麻麻，劇中夏雨大講潮語，角就係由基層做起，演變成茶餐廳老闆做到上巿奶茶王，話明奶茶王，夏雨開拍前特意去體驗生活，o依家沖奶茶手勢幾近專業，受訪當日在茶餐廳露兩手，即場沖奶茶分享秘技，夏雨邊沖邊講解話：「茶葉、水溫、手勢過程之外，最重要奶落幾多，同埋奶要落先。」表面看似簡單，背後功力十足，夏雨深明道理：「凡事愈簡單愈講究，點樣喺簡單中做到最好反而最難，做老豆我都做幾百次，但點樣做出來有分別呢個最難。」
第一、二輯溏心推出時，觀眾反應熱烈，金句對白街知巷聞，今次甩掉金句改為潮語加插，夏雨話：「頭兩輯金句係情節去到咁，加上演員演繹深入民間，拿起劇本冇話係金句，今次係少咗金句多咗潮語，最初我都唔知乜係乜，網上好流行，我最常講係『一定得，除非唔得』，講咗等於冇講。」夏雨對呢套台慶劇充滿信心，佢話：「拍戲錢同時間係兩大因素，冇呢兩樣嘢好困難，今次有國內騰訊投資合作，錢比無綫本身製作多好多，成立合拍部門去搞今次製作，幕後有足夠時間去搞劇本籌備，台前演員合作咁多次好有信心，大家渴求第三輯，各方面準備充足，我諗唔到點解會唔得。」
夏雨劇透一輪爭產風波過後佢會昏迷入院，之後會點就叫大家繼續留意，並披露一場佢同飾演女兒陳敏之感人戲份，夏雨話：「我最深刻同敏之，佢係能幹有學歷好女仔，但未拍過拖，之後喺河邊自殺，我救返佢，喺醫院同佢講返幾十年往事，呢場好感人，喊得好緊要。」
場地提供：華星冰室
更多娛聞，喺晒《娛果》
http://fb.com/appledailyent
|
鍾意就快D Share啦！
|
|
|
