由少女轉眼已成為「Super媽」的楊千嬅，即將第七度登上紅館舞台開唱，今年43歲的千嬅不知何時會停下來，因為世事如棋，今日不知明日事，每做一次演唱會就少一次，就像她的生命在倒數一樣，是否最後一個紅館騷又有誰知道呢？
楊千嬅於1995年出道，今年12月將是她第七次踏上紅館舞台開唱，她坦言每一次開騷都有壓力：「一個人孭飛嘅演唱會、電影都會有壓力，因為你永遠想要求自己做好吖嘛，藝人要求係奄尖，雖然成日都話唔介意人哋點睇，其實暗地裏對自己已經有要求，你點樣唔介意人哋點睇啫？如果你真係好唔介意人哋點睇，你都唔會做幕前啦，你就係想人睇你先做幕前，所以每個演出都有壓力！」而壓力會隨住年紀、經驗、心態而有不同擺位，以前可能是輿論壓力，或者自我要求的壓力，如今壓力可能會轉移到成個演唱會製作上，不過她要學識去平衡，否則自己就會變得多事。
視汪明荃為榜樣 讚犀利
千嬅坦言演唱會做一次就少一次，就像她在倒數自己的人生一樣，這是每個人成長歷程都要面對，她不知道自己還會唱幾多年，但她覺得有一日會停下來：「可能係世界話我知，或者我覺得要搵番自己嘅生命節奏，又或者個仔叫：『媽咪你真係停囉』，咁依家仲可以做咪做咗先，我唔敢包可能呢個係我喺香港、人生最後一次，我覺得唔出奇，因為冇人知道會發生乜事。」她坦言要唱到老並非一件容易的事，所以她很尊重汪明荃，她覺得對方是一個榜樣：「佢唔係淨係攞住個地位去做人做事或演出，佢係攞自己嘅生命同力量去做，呢份堅持、意志幾犀利，我自己都唔夠膽講到咗70歲，係咪仲係咁嘅狀態，呢樣唔係我話事，我只能盡力令到自己生活過程處理得好或準確，但你唔能夠去控制自己過程有幾長。」
破自己紅館紀錄 無憾
今次一連十二場演唱會打破了千嬅自己的紅館紀錄，她說：「我唔做我會後悔，但起碼自己冇遺憾先。」很多歌手都呻申請紅館的檔期難過登天，更恨搶到聖誕、除夕這個檔期，今年本沒有計劃開騷的千嬅，卻「幸運」唾手得到這個黃金機會，也是她在紅館第一個倒數跨年騷，但她覺得不能夠用「幸運」這個字眼，她以「緣分」來形容這件事。
今次開騷最難是與時間挑戰，由申請到拍板開騷僅得半年時間，對比上一次紅館騷，她用了一年時間去鋪排，慶幸跟公司合作了十年，大家有一定默契，因為彼此間的信任，令她節省了時間，雖然過程是困難，亦有一定壓力。
任性反傳統 3秒鐘改變世界
當年千嬅第一個紅館騷是三面台，可能是新人關係，公司覺得風險比較低，但今次她為三面台跟公司進行一番角力，她指三面台最需要是製作，但她從來用人力去做騷，很少用製作幫自己做，即使明知會比四面台吃力，但任性的她好想反傳統一次，將成個跨年騷反傳統去做，她覺得倒數有反的意思，她說：「有跟開我嘅音樂歷程、我嘅成長，你都唔期待我普通做一個拋吓、掟吓煙花紙碎嘅跨年，你一定有好奇心究意我會做一件咩事，其實我演唱會海報已經講咗，我想將夢想融入晒演唱會，成個騷就係人生一個倒數，海報上『321GO』其實係一個力量一個衝勁，正是依家香港人互相加持嘅能量，三秒鐘可以好多嘢發生，亦可以改變世界好多事，希望將呢啲嘢融入我嘅歌曲，倒數番我嘅初心。」
做完畀人鬧？
能夠回到初心如願做一個三面台，千嬅說：「因為有種舞台係我冇去駕馭過，觀眾只係知少咗好多飛，但作為一個表演者三面台嘅難度高過四面台，因為所有嘢要做得準確仔細，每一個焦點全放喺我身上，四面台反而個人可以放鬆少少，因為視野注意力、甚至嗰道力都分散啲，個人狀態冇咁繃緊，但三面台凝聚力強啲，演繹上層次高少少，今次演唱會以音樂性、舞台性為主，可能非歌迷或影迷所想嘅『楊千嬅』，可能做完畀人鬧，但我好想做一件有意義嘅事，每一日每分鐘都可以倒數，可以重新開始，有能量洗去唔好嘅記憶，回到初心。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|