近年愈來愈多人參與馬拉松或者越野跑的行列，有些甚至衝出香港，跑向國際。陳文霞(Samantha)是其中一個狂熱份子。
Samantha對運動的熱愛，源於小時候參與過田徑隊的訓練，但畢業工作後，忙碌的生活令她放下這項運動。五年前一次偶然機會之下，和當時公司的同事組隊，參加「毅行者」後，再次燃起跑步那團火。
五年來，Samantha參與過無數海內外的長跑賽事，當中最「難捱」的，要數今年九月底，在敦煌舉行的第三屆400公里「八百流沙極限賽」。
這個「八百流沙極限賽」，是內地首個超長距離的不間斷、自補給、自導航越野跑賽事，貫穿甘肅酒泉三個縣市(瓜州、敦煌、肅北)，八成的賽道都在荒漠無人區域，日夜溫差極大，最高達30℃以上，低則至-10℃左右，真是白天「熱風如火」，晚上卻又「寒風如刀」，挑戰人類的極限。
「我覺得400公里太變態啦，我無玩過咁長距離嘅比賽。」即使身經百戰「好打得」，一開始，400公里的距離仍然令Samantha卻步。
「但佢哋講到個比賽係天上有地下無，好吸引，同埋唔使我交3000幾蚊美金嘅報名費！」再三考慮後，Samantha決定接受這個400公里長征的挑戰。
經過戈壁、雅丹、丘陵、鹽鹼地、沙地、峽谷、河流、高山草甸，來到比賽的第四天，本身帶著腳傷來比賽的Samantha，終於捱不住了：「我起身全身都好痛，然後我用咗一分鐘時間坐起身，想著鞋，但我隻腳掌放唔入去，因為太痛啦，果一刻我崩潰了。」
後來在工作人員協助下，Samantha才穿好鞋，營地醫生為她簡單治理後，她繼續忍著巨痛比賽：「我已經玩咗330公里，只係剩返70公里就完成，剩低咁少我唔想喺呢個時候放棄，如果我完成唔到，出年我會再嚟，又要行多330公里，加埋700幾公里我咪好唔抵？！」
就是因為這樣，Samantha堅決完成400公里的比賽，最後更以119小時33分鐘，奪得女子組的第三名，亦是第一個在這比賽獲獎的香港女性。而43個參賽者中，只有32人順利完成比賽。
Samantha另一難忘的比賽，可說是2015年的摩洛哥撒哈拉沙漠250公里馬拉松。
這是她第一個海外大型賽事，單是報名費已接近三萬元港幣，還未計機票和住宿，但Samantha一於少理：「我好想試下喺沙漠生活係咩情況，同埋我覺得好過買一個名牌袋，因為呢啲經驗，我呢一世都唔會忘記，但我買一個名牌袋，我用到殘咗就會換第二個。」
故事發展至此，大家可能以為Samantha是「人在野」的朋友，但她卻自稱是典型的港女一名：「你唔好叫我去露營，我屋企無睡袋，喺山上過一晚？無咩事都唔好啦。」
雖然是這樣，都無阻她對越野跑的熱愛，看似很矛盾，但她卻樂在其中：「如果生活無運動，或者唔跑步，好似好頹，無論我做咩都好似欠缺一啲活力。我可能有啲情緒想去發洩
淨係行街、食飯、睇戲我發洩唔到。」
而這個基層家庭出身的港女，在享受越野跑之餘，亦為基層的小朋友籌款：「小朋友如果發展一個興趣嘅話，我唔知對佢將來有咩影響，如果因為屋企環境令佢唔能夠參加課外活動，我覺得好可惜。」
《港。故》帶大家看看，這個充滿愛心又好捱得的港女故事。
-------------
《港。故》：東網電視每周專題習作，講故事、講香港人的故事，請關注《港。故》fb：https://goo.gl/bGXUx1
|
鍾意就快D Share啦！
|
|
|