「9歲咁上下，決定咗送我去寄宿。」一住兩年。
從小與母關係疏離的翁靜晶，從未忘記母親送她到寄暫學校那一天。
「因為呢刻生離死別，你會想攬下，但因為佢俾我嗰個教育就係軍訓，冇情感㗎，咁我就，『好啊，拜拜！』我就擰轉面。我知道佢一直望住我㗎，但我冇回頭 ，喺嗰一刻，我走嘅時候，我唔知有冇人接番我走，我就咁樣行咗去。」
「喺嗰間學校入面，我係受咗好多虐待，俾個校長用板球棍，一支板球棍，打手板，打咗四十幾棍。」（詳見另文）
皮肉之痛還可以忍，但尊嚴呢，睇你有冇「後台」——或者，有冇人探，非常勢利。
「間學校嗰時有個制度，叫枱長制度，每一張枱有個年紀大少少嘅小朋友，佢負責分派啲餸。啲餸上咗枱面，唔係你要夾邊件就夾邊件，唔准㗎！係要個枱長分俾你。
「因為我冇人嚟探我，我媽媽唔嚟探我，差唔多半年、一年咁樣。大部份小朋友，星期五星期六就送去大會堂上車返屋企，但我係長年累月冇得返屋企㗎，咁你冇得返屋企嘅後果係咩呢？學校係規定有生果籃擺喺度，食飯之後有生果，因為好耐都冇人嚟探我，咁我個籃就永遠都空嘅。」
咁點算呢？惟有偷。「因為人哋啲父母會擺多少少，咁我就喺人哋度，呢度偷一個，嗰度又偷一個，集合我自己個籃，先至唔會受罰。」受罰可不是說笑的，係真係打你。「話嚟打你，就嚟打你㗎喇。」究竟翁靜晶係入咗寄宿學校，還是被送到女童院？真係咁離譜？
翁靜晶憶述時，像在述說別人的故事，神情淡然，還會笑。畢竟，一切都過去了。
「我自己沖涼都沖得唔好，啲番梘係洗唔乾淨，我成身啲皮膚爛晒，全部，乜嘢地方都爛晒，仲要俾啲護士話，好眉好貌生沙蚤。已經成身爛晒，仲要鬧你！」
何以寄宿學校由校長到師生都可以如此肆無忌憚？翁靜晶稱，因為睇穿你冇靠山：「咁嘅情況，人哋係知道你冇人冇物，就咬住你嚟蝦，一段好長嘅虐待過程。」
母女感情淡泊，但總未至於不聞不問，同傳統中國人一樣，母親都有為女兒「舖路」——就係送禮俾寄宿學校，希望校方可以對女兒「多多關照」：「嗰陣電視機係一件好大嘅禮物，咁佢就送禮物俾校長，我好記得，係圓形嘅電視機，好靚嘅，黑白。佢送重禮俾佢哋，希望佢哋可以對我好啲，佢唔知我喺入面受到咁大虐待，佢係唔知嘅。」
結果呢，翁靜晶想法子自救，就係靠四個字，「連根拔起」，怵目驚心的四個字：「我後來終於識寫字，就寫咗一封信，求個花王幫我寄出去，一封求救信，寄俾我阿媽，我就寫，『他們說我把花連根拔起，但是我沒有把花連根拔起。』因為我啱啱學咗『連根拔起』呢個成語，於是我就不停不停咁重複呢個成語，我話佢哋打我，咁媽媽收到呢封信之後，知道喇，就嚟救我喇。」
翁靜晶總結：「我喺入面應該係住咗兩年，呢間係一間貴族學校，好貴，嗰陣時係相當之貴嘅一間學校，但我睇嗰間嘢，就仲弊過女童院囉。」
記者：嵐山、馮國康、倩宜
攝錄：馮峰、卓振輝
攝影：陳俊強
更多娛聞，喺晒《娛果》
http://fb.com/appledailyent
【俠味道‧翁靜晶(1)】恩愛三十載之謎 翁靜晶點解叫劉師傅做細B？
http://bit.ly/2AnvNoz
【俠味道‧翁靜晶(2)】明知劉家良已有家室 翁靜晶：以前嘅社會好唔同
http://bit.ly/2jbxufo
【俠味道‧翁靜晶(3)】浪漫等如浪費 劉家良餵包餵到翁靜晶反面？
http://bit.ly/2kiuroY
【俠味道‧翁靜晶(4)】翁靜晶 劉家良戲假情真 張國榮原來係月老
http://bit.ly/2kkwDw3
【俠味道‧翁靜晶(5)】悲慘童年練就堅強個性 翁靜晶親述被虐經過
http://bit.ly/2zLBObq
【俠味道‧翁靜晶(6)】越南出世 翁靜晶點樣「攝罅」成為「香港人」？
http://bit.ly/2BxxcGd
【俠味道‧翁靜晶(7)】父母離異 翁靜晶9歲入貴族學校寄宿受虐：成身皮膚爛晒
http://bit.ly/2zO7sVT
【俠味道‧翁靜晶(8)】母親錫晒孻仔 翁靜晶14歲離家出走：你打死我
http://bit.ly/2A3xPeg
|
鍾意就快D Share啦！
|
|
|
