【謎網風暴】
【本報訊】廉署上周與證監會聯合調查康宏環球（1019），並拘捕該公司4名現任及前高層，但康宏執董、被指是今次調查對象及謎網50主要人物的曹貴子一直未現身。由曹創辦的康健國際（3886）上月已遭證監會停牌，康健副主席、被指與曹關係千絲萬縷的「玩具大王」蔡志明，昨接受《蘋果》專訪，澄清不是曹幕後金主，又指曹曾與家人向他下跪求救，「話蔡大哥你一定要幫吓貴子」，但蔡拒絕，強調「今次唔會再心軟！」
記者：莊建鑫 黎少英
現時擔任康健國際醫療副主席及非執行董事的蔡志明於2005年入股康健，蔡稱認識康健創辦人、行政副主席兼執董曹貴子因一次「睇醫生」，稱讚對方「好聰明，做嘢好叻，同人相處又好」而交上朋友，但股份買賣全交曹打理，自己鮮有過問，「數目咁細，只係我生意萬分之一，點會care」。不過他承認曹貴子過去多次向他借錢，但只是數億等「小數目」，事後連本帶利歸還，但曹現時仍欠他5億元未清還。
女兒曾為事件哭兩次
至於下跪求救一事，蔡表示大約發生於兩個月前，他指「佢（曹貴子）老竇老母同老婆有個禮拜日朝早同埋佢，走嚟我屋企跪我，嚇到我死！話蔡大哥你一定要幫吓貴子呀」，不過蔡志明稱當時拒絕了對方。
至於最後一次見曹貴子則是一個多月前的事，蔡志明稱當日曹到其辦公室借錢，「我話醫生，家唔係借唔借嘅問題，我話你呃我咁耐，個個都話我係你後台金主，如果我今次再借錢畀你，啲人就會知道我係你後面老細，所以你係自己害自己，我仲會同人講今次一定唔會救你，我救你即係自己害自己！」
蔡志明又指今次不會再心軟，不會借錢給曹，他直言雖然不是大數目，但擔心會再被拉上關係，「我略略同佢諗過，借20幾億應該搞掂晒……但你（曹貴子）呢單嘢幾十隻殼，你害死好多人，淨係一隻康健，加怡（蔡志明女兒）已經喺我面前喊過兩次，你（曹貴子）家幾十隻，你諗吓幾多人畀佢害咗！」
蔡續稱，事後曹貴子多次發短訊向他道歉，「佢猛道歉，但我唔可以原諒佢！」他補充，女兒加怡雖出任康健主席，但只是掛名，主要負責醫生的人手安排及生意擴充，並無沾手股份買賣。蔡志明透露，證監會介入調查後，他曾向女兒查問了兩次，女兒表明：「老竇！我真係乜都唔知。」
指公司支票被當生招牌
廉署上周四首度與證監會展開聯合調查行動，以涉嫌貪污拘捕康宏副主席馮雪心、執董陳麗兒及前行政總裁、隆成金融（1225）現任主席麥光耀，翌日康宏主席王利民亦被捕，各人其後獲釋。不過被指是調查對象、亦是謎網50主要人物的康宏執董曹貴子至今下落不明。
問到是否知道曹貴子行蹤，蔡志明稱估計對方身在澳洲處理醫療業務。對於坊間指他與曹貴子關係千絲萬縷，更被指是曹的幕後金主，蔡志明大嘆無辜，他解釋以往曾開支票借錢予曹貴子，懷疑有人以印有其公司名稱的支票作「生招牌」，才令人誤會。
|
鍾意就快D Share啦！
|
|
|
