「木偶哥」林師傑昨晚在勁歌金曲頒獎禮後的慶功宴上，被老闆何哲圖大爆已向女友歐陽巧瑩成功求婚，為2017喜事又添一單。二人接受東網訪問時，就甜蜜承認喜訊，歐陽巧瑩稱：「多謝大家嘅祝福同關心，啱啱收工就收到一堆炸我WhatsApp嘅messages，都開心嘅。依家呢我哋呢個（結婚）計劃就籌備當中…其實係未正式開始籌備嘅。」她直言沒有想過如此快公開，因為二人仍未計劃婚禮細節，她表示男友一向知道她不喜歡驚喜，早於幾個月前帶埋她一齊買求婚戒指，買完就放在家中當眼處，她說：「佢成日見我去睇吓，直到有一日，好似係上個月左右，我哋夜晚傾偈，回憶三年嚟大家一齊經歷好多、進步好多，亦喺對方身上學到好多嘢，唔只係情侶，更加係靈魂伴侶，覺得係時候喇，就戴起咗隻戒指！我好滿意，成件事好舒服！多謝佢送咗自己畀我！」並笑指男友常常引她去戴求婚戒指，笑指台慶時的服飾，與戒指十分相襯，叫她在台慶時將戒指戴上。
秘密訂婚個幾月
然後二人解釋原來因為早前雙方都忙於拍劇、出埠和工作等，夾唔到時間好好籌備婚禮。林師傑其後就話要多謝屋企人同老闆：「首先要好多謝屋企人啦，兩邊屋企人都好支持我哋做呢個決定，另外我哋都已經深思熟慮咗一陣，我哋秘密engaged（訂婚）咗個零月。其實真係都好多謝Herman（何哲圖），今年係多得佢一番說話令到我有呢個動力同信心去做（求婚）呢個決定，多謝佢喺呢個年尾，或者話呢個年頭送一份咁好嘅禮物同回憶畀我哋！」
大讚師傑好男仔
歐陽巧瑩都表示認同，又大讚未來老公：「仲有（Herman）幫我哋擇埋日，令到我哋有啲方向。開始嘅時候其實我哋真係完全冇方向，因為我哋兩個都冇當呢件事係咩。我覺得兩個人一齊最緊要係開心，大家都有成長，呢三年大家都成長好多，我成日見到啲新聞話Herman讚我係好女仔，咁師傑都係個好男仔嚟嘅，呢三年佢都令我有成長咗好多，我都好有信心呢個男仔係一個可以付託終身的一個對象來嘅。」
最後二人一同多謝大家祝福，又祝大家新年快樂：「大家都開開心心，幸幸福福啦。」
|
鍾意就快D Share啦！
|
|
|
