尋晚嘅《勁歌金典頒獎典禮2017》圓滿結束，不過唔少網民就狂批當晚司儀的麥明詩＊（Louisa），不但講嘢口窒窒，把聲又唔掂，總之表現就強差人意！而麥明詩接受東網電話訪問，佢話：「第一次主持live嘅節目咩都唔識，例如啲時間控制、點樣應對臨時嘅改動，而今次喺6號（陸浩明）身上吸收咗一啲嘅經驗，同埋一啲貼士，之後都會睇多啲好似嘟姐（鄭裕玲）主持嘅節目，喺佢身上偷吓師，希望下次就會做得好啲，同埋快啲箍完牙。」
馮盈盈接受東網訪問時就逐點解釋，叫大家將焦點放番喺得獎歌手身上，佢話：「我哋MC 只係陪襯，唔好畀我們搶焦點，其實網上嘅回應，我有睇，話晒我同Louisa一樣第一次主持一個大show，咁都有唔同意見，又唔係一面倒劣評，都有comment話呢個組合都幾新鮮，搞笑同風趣，有耳目一新嘅感覺。」
盈盈又承認有唔少地方需要改善：「第一就係講嘢太MK，唔夠莊重，其實我哋嘅主題係『Music is Everywhere』，想講貼地生活化，所以我哋嘅表達方式都貼地啲，希望大家覺得玩嘅嘢好親切，好似重播嘅《壹號皇庭》，hit嘅抖肩舞，同埋歌手嘅緋聞，大家都可以笑吓。」
至於被批評食螺絲，盈盈坦言有苦衷：「因為個節目開始冇耐就超時，但個頒獎禮咁多嘢要頒，歌手都要講得獎感受，如果你有睇足成個show，我哋三個MC係冇催促個歌手講快啲或Cut佢哋啲歌同得獎感言，因為主角係歌手，所以畀佢哋講咩就講咩，犧牲個位就係我哋MC講嘢嘅時間，所以之前預備咗嘅Tag同環節都冇玩到同講到，仲要成件事加速，要講快兩句添！」佢又認為佢哋作為第一次做大show主持，已經盡力做好，都畀到自己一個交待，希望自己可以繼續學習，有所進步咁話！
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
