廣東話有句說話係「眼大大易學壞」，計Nuts哥話齋「眼細細捱出位」，就好似「表哥」姚子羚咁，因為一張電視Cap圖畀人P成豆豉眼加一句對白「表哥」，令子羚變成萬能P，有佢嘅地方就有表哥！唔係天生矇豬眼都被整容到有矇豬眼，以為佢真係隻「多麼蠢的蠢豬」？其實佢係隻披着豬皮的稀有「睛羚」就真， 雖然睇落CP值唔高，但潛在嘅攻擊防禦力勁過亞視嘅不死精神！
「立花子羚」俘虜巴打
講句公道說話，子羚明顯唔係靠樣搵食嘅偶像派，當年「四葉草」年代嘅佢戴住副娘到核爆嘅無框眼鏡，一副天真無邪嘅樣，表面毫無殺傷力，但係發起惡上嚟勁過金仔狂搞核試兼狂射導彈！拍劇做極都係做人細妹，條阿二命就嚟長過排隊輪街症，但做阿妹做到上位攞埋最佳女配角你估人人都得咩？我Nuts哥雖然唔識咩風水命理，唔識「睇掌睇相」，但「表哥」真係好有女朋友Feel，庸中佼佼，仲識得喺facebook同班巴打Social自嘲表哥眼，加上似AV女優立花里子，而被叫做「立花子羚」，得民心就得天下，仲使鬼好似某男藝人拜狐仙咩！正所謂「表哥眼唔起眼」，深藏不露是一種卓越的才能，識得隱藏實力嘅人先係王道，到最後就好似電影《月黑高飛》嘅主角咁，靠自己雙手鑿穿牆闖出一片天，到你發現嘅時候就「夫子奔逸絕塵 而回瞠若乎後矣」，以為佢係「懵豬」嘅人先至懵！
純情白兔 食仔量少
喺呢個是非多多嘅娛樂圈，同行如敵國，唔係你死就我亡，但係「表哥」就搵到班同佢啱嘴形嘅閨蜜，搞埋個「胡說八道會」！講真嗰句，「表哥」都可以話係派得最少花生嗰個，你睇吓定欣又有陳展鵬、馬國明，黃智雯雖然戀情穩定但又被指搭上袁偉豪，仲有杏兒老公竟然係李施嬅前度，閂埋門一家親，啲關係七國咁亂！相反「表哥」就食量少得驚人，除咗得個夜場老闆舊愛外，就係得正印「的士邦」鄭子邦，佢個底仲要乾淨唔使漂白，唔信就Search吓，「夜蒲」、「溝女」呢啲Terms乜都冇，「有米太子爺」就有佢份，真係要吸隻白兔仔畀佢呀！
籃球神射手 情場無敵手
唔會眼大睇過龍嘅「表哥」曾喺香港乙組籃球聯賽隊擔任前鋒，眼界準到獲封「三分神射手」，就算闖入情場都有優勢，雖然上一次射入咗但畀球證話得分無效，不過臨完場前撞正個辣司機，成功泵走情敵Janice Man，0.1秒轉身射個三分波做埋Buzzer Beater，就係咁袋袋平安坐正埋，依家只係等上台加冕！男友叫得「的士邦」就梗係唔嘢少，物業過億兼坐擁過百部的士，可謂「有的士有高潮」，隨時「讓靈魂遊走」！
雖然「表哥」又釣中金龜，但佢就靠自己用真金白銀使成千萬買磚頭做業主，有的士又有樓，仲唔係人生高潮？如果我Nuts哥係珍姐或者樂小姐，就一定開套《表哥你好嘢》畀佢拍，捧埋佢做女優，呀唔係，係女一，教大家如何做隻「精羚豬」！
|
鍾意就快D Share啦！
|
|
|