盧巧音（Candy）四年前低調嫁Kolor主音蘇浩才，早前自爆夫婦齊患抑鬱，幸互相扶持下，成功擊退病魔。Candy前晚及大前晚在旺角麥花臣場館舉行一連兩場演唱會，請來鄭秀文（Sammi）任嘉賓令觀眾相當驚喜。同樣被抑鬱症困擾過的Sammi，表示見Candy能健康站上台很開心，Candy亦指自己已經完全康復。
韓國男團SHINee成員鐘鉉一直受抑鬱症折磨，本月18日燒炭自殺，送院搶救後不治，再引起大家關注藝人壓力及抑鬱症問題。現年43歲的盧巧音，明年入行20年，四年前嫁組合Kolor主音（Sammy）的她，早前自爆婚後和老公齊齊患抑鬱，曾暴瘦至只剩90磅，她之後接受專訪時表示，當時靠做運動出一身汗緩解病情，又與老公一齊睇醫生，用夫妻感情戰勝病魔。
現已走出陰霾的Candy有八年沒有在香港舉行演唱會，前晚及大前晚重踏舞台，在旺角麥花臣場館舉行兩場「RE:TURN演唱會」，寓意她再次回來，林曉培及黃偉文都有捧場。
跑步重新開始
甫開場，Candy以一襲純白連身長裙現身，接連唱出《沮喪》、《昏迷》及《自戀影院》，Candy在台上說：「我今年43歲，由舊年開始跑步，我覺得係一個check point，對自己一個承諾，以前我會換好衫然後坐喺屋企睇電視，再換番衫沖涼瞓覺，𠵱家我應承咗自己要今晚跑10K，就一定要完成佢，希望大家都搵到自己人生嘅check point，愛多啲自己。」Candy續謂：「入行20年期間遇到過好多人，用唔同態度對其他人會得到唔同結果，我以前對人唔係好好，所以得到嘅都唔係太好，但我發覺呢啲係人生嘅功課，我要多謝所有愛我、憎我、講我壞話同講我好話嘅，全部都要多謝。」
Candy第一場請來周國賢任嘉賓，前晚現身則是鄭秀文，當Candy唱《喜歡戀愛》時，全黑打扮的Sammi忽然出現，全場觀眾即報以熱烈掌聲。Sammi笑問觀眾：「大家唔好奇怪點解我會嚟？因為我好貪玩，乜年齡層嘅聚會都有參與，所以我同Candy係認識咗好耐，雖然我哋年紀唔同。」Candy隨即搭嘴：「差少少啫。」
曾經受抑鬱症困擾的Sammi，指有留意Candy訪問，她說：「過去兩年你出現咗少少狀況，睇到你面對嘅過程令我好感觸，見到你𠵱家健健康康再企上舞台，大家要多多支持。」Candy則表示：「初初請Sammi時覺得佢未必得閒，點知佢覆我話可以時，我真係開心到心跳加速。」Sammi即笑言：「點知原來我真係咁得閒，好多歌手都有請我做嘉賓，我真係唔介意做嘉賓王㗎！」
唔夠喉想再唱
完騷後Candy接受訪問，提到Sammi任嘉賓，她說是喜出望外：「第一場嘅嘉賓係周國賢，我希望兩場演出請一位前輩一位後輩，我覺得佢哋兩個係我心目中嘅人選，好多謝佢哋願意幫手。」她又指二場演唱會「唔夠喉」，希望有機會再演出。
採訪：曹家誠
攝影：林賓尼
|
鍾意就快D Share啦！
|
|
|
