現年27歲無綫前新聞小花陳嘉倩捲入爭仔風雲！去年尾被爆戀上凸腩男，對方被揭有案底後，嘉倩BB速斬纜宣告分手。而以正印自居的無綫姐仔朱婉禎，指控小三死纏爛打求復合，自己都收到短訊滋擾；嘉倩BB昨到中環警署備案，聲稱疑有人以電話恐嚇她：「我擔心自己人身安全有威脅！」
中大畢業的陳嘉倩有樣有學歷，被網友封為女神，去年11月嘉倩BB被本報踢爆與凸腩男拍拖，其後男友陳志遠被揭有案底，更被爆疑另有正印女友朱婉禎。雖然嘉倩BB快刀斬亂麻宣佈分手，但朱婉禎接受昨日出街的雜誌訪問時哭訴，矛頭直指嘉倩BB做小三，有人分手後更狂傳箍煲短訊，以「老公」稱呼其男友求復合，留言：「你唔好走」，朱婉禎更公開曾於半夜二時許，收到由「陳嘉倩」圖像發出的私信，向她詢問男友聯絡方法。
「返屋企都會驚」
陷入桃色風波的嘉倩BB，昨午約一時現身中環中區警察服務中心備案，由前主播同事余浩宗及男友人陪同，她說：「好多報道唔真實，傳言滿天飛，近期我收到電話，唔知乜嘢人嚟，短訊又好電話又好，一啲威嚇性言語，我擔心自己人身安全有啲威脅，屋企人都好擔心，好困擾，驚出街俾人跟，所以嚟備案先。」
對於朱婉禎在雜誌的指控，嘉倩BB澄清：「首先我唔知有咁樣嘅女仔出現，我同陳先生相處時間，從來冇聽過有一個咁樣嘅女士，唔排除中間有人隱瞞事情，我可能被蒙在鼓裏。𠵱家網上世界好勁，可能某啲人攞住圖片刪改啲嘢，就話嗰件事係真，又話我身邊朋友同報紙爆料話我有喜，全部唔係真，有必要作出澄清。最緊要保障我人身安全，因為好多嘅恐嚇訊息，有時返屋企我都會驚。」
「沒有帶眼識人」
對於雜誌刊登的對話截圖，嘉倩BB表示：「我唔排除有人當中收過啲乜嘢，但我同佢分手，係冇乜嘢激烈事發生，或第三個人。」她指與陳志遠拍拖未夠一年，自對方傳出負面新聞，兩人已和平分手：「考慮咗一段時間，已慢慢疏遠，但分手後越嚟越多呢啲嘢發生，以為唔回應，謠言止於智者，但原來唔係，可能有人抹黑我，大家都蒙在鼓裏。」
晚上嘉倩BB在社交網撰千字文反擊：「我陳嘉倩重申一次，這一連串新聞都屬不實報道。我不會讓自己陷入羅生門，更不會搬出任何照片及斷章取義的對話紀錄，因為我已將這半年來我所受的滋擾及威嚇交由警方處理。」嘉倩BB強調分手後沒有苦苦哀求：「怎料提出分開後，就收到不斷的威嚇、滋擾，亦有人揚言要每天跟蹤我，我擔心自己的人身安全，今天才站出來，將所有對我的威脅行為報警備案，並希望造謠者能停止。我不怪那位哭泣的女士，更不怪這一連串新聞背後的造謠者，我只怪自己當初沒有帶眼識人。」
採訪：羅慧敏
攝影：陳慧安
|
鍾意就快D Share啦！
|
|
|
