亞視《活色生香》前主持洪羅拔13年罹患肝癌，雖積極樂觀抗癌，但連續幾年都不停復發，明日是他生日，可惜天意弄人，洪羅拔昨早在威爾斯親王醫院病逝，享年61歲。洪羅拔姪兒昨日證實死訊，由於洪羅拔近年不停癌症復發，家人都做足心理準備。
亞視前藝員洪羅拔（原名洪瑋程）在13年患上肝癌，並積極抗癌，早年康復，惜近年再度復發，但他一直樂觀面對。洪羅拔明天生日，大前日原約定好友飯敍，可惜抱恙缺席，更原定今日跟好友杜貞貞等到澳門慶生。可惜天意弄人，洪羅拔昨早9時病逝沙田威爾斯親王醫院，享年61歲。杜貞貞昨日獲悉消息，即聯絡洪羅拔姪女，陪伴她辦理後事，定於本月16日於世界殯儀館為洪羅拔設靈，翌日早上進行大殮儀式後出殯。
遺願大家開心
洪羅拔在13年發現罹患肝癌第一期，需做手術割去腫瘤，可惜事隔未夠十個月，在14年復發，他到私家醫院接受標靶化療。可惜在15年又再翻發，需要在大腿插管打標靶藥到肝臟殺死癌細胞，雖然面對抗癌痛苦，但他仍是開朗面對。洪羅拔有一兄兩姊，大哥前年初亦因肝癌病逝。
洪羅拔昨日病逝，他姪兒洪先生電話回覆指叔叔沒有牽掛，遺願希望大家都開心，喪禮將會以藏傳佛教儀式舉行。洪先生在電話說：「叔叔今朝9點走，佢都病咗好多年，呢兩日有啲唔舒服，又屙又嘔，所以call白車入醫院。」洪先生表示叔叔四年多前患肝癌，已做過各樣化療、電療，一度康復，可是之後復發，需要經常進出醫院：「佢一直好勇敢面對，可惜又再復發，每年都有去醫院做手術，做完一次又復發，之後又復發。所以我哋家人角度，係有心理準備。」洪先生稱叔叔是虔誠教徒，患病期間亦早晚念經。
洪羅拔好友杜貞貞昨獲悉噩耗，她表示：「我哋本來約晒10個人同佢過澳門慶生，都去唔到，佢好想去澳門㗎！」她謂大前日在尖沙嘴遇到洪羅拔，大家結伴到茶餐廳開餐：「佢係瘦咗，精神唔係太好，但好過上次見佢時，我仲擔心禮拜一仲去唔去到，之後再打畀佢，叫佢唔好勉強，唔舒服就睇醫生，佢猛話冇事。佢家姐話佢夜晚唔舒服，第二朝送院，佢一直有肝病，可能惡化。走嗰時家姐有一直陪住，佢哋一家人好close。」杜貞貞續說：「當時佢喺茶餐廳話有啲發冷，話好凍，人生就係咁化學。」
周五缺席飯敍
洪羅拔生前另一好友肥媽昨說：「本來上星期五仲話約出嚟食飯，我唔得閒，最後佢又入院，點知兩日就走咗。」肥媽大讚洪羅拔為人：「佢係一等一好人，乜嘢都係先諗朋友，再諗自己，我聽到佢死好傷心。」
洪羅拔圈中人緣甚廣，跟梅艷芳識於微時，見證阿梅成名前辛酸，兩人私交甚篤。洪羅拔成名作是他88年加入亞視後，跟周美鳳及李道洪主持清談節目《活色生香》，當時廣受觀眾歡迎，而洪羅拔的遺作則是杜琪峯05年執導的電影《黑社會》，飾演古天樂大佬「官仔森」。
採訪：魯吉、林妙萍、楊定
|
鍾意就快D Share啦！
|
|
|
