掃呢頁CODE去手機

2018年1月26日 星期五

政Whats噏:政Whats噏︰怪招頻出 朱凱廸終玩死自己 __,朱凱廸,

朱凱廸頻頻出怪招,今天畀陳帆寸番轉頭,可謂玩死自己。(設計圖片)立法會議員朱凱廸頻頻出怪招拉布,而針對建制派修改《議事規則》,朱凱廸早前更首次引用《基 ...


朱凱廸頻頻出怪招,今天畀陳帆寸番轉頭,可謂玩死自己。(設計圖片)


立法會議員朱凱廸頻頻出怪招拉布,而針對建制派修改《議事規則》,朱凱廸早前更首次引用《基本法》條文動議多項傳召政府問責官員就各社會事項到立法會交代嘅議案。喺今日(25日)嘅立法會大會,佢動議傳召運輸及房屋局局長陳帆到立法會就橫洲事件解畫,但就畀陳帆寸番轉頭。朱凱廸今鋪真係玩死自己喇!

民主派全方位喺各個委員會拉布,幾乎令立法會癱瘓,好似早前為咗拖延政府審議一地兩檢無法律約束力議案,朱凱廸曾就《2017年銀行業(修訂)條例草案》提出不中止待續議案,到正式辯論一地兩檢議案,佢又動議要求新聞界及公眾人士離場,引起社會各界嘩然。

日前建制派修改《議事規則》,民主派出多項「怪招」,包括提出動議譴責立法會主席梁君彥在內嘅多名建制派議員,又首次引用《基本法》第73條要求傳召官員。隨住通過修改《議事規則》,呢批怪招本已失效,加上律政司司長鄭若驊爆出僭建醜聞,民主派早已撤回部分怪招。惟朱凱廸就唔肯「自撤」,全數保留5項傳召官員議案。

朱凱廸今日先後喺立法會大會會動議傳召陳帆同發展局局長黃偉綸到立法會,就橫洲發展計劃決策過程及聘請顧問公司一事解畫。其實早喺立法會財務委員會審議相關撥款時,朱凱廸已出招要求抽起相關撥款嚟審議,依家又再「炒冷飯」。陳帆會上就反駁,政府已多次到立法會就橫洲發展計劃作交代,包括出席立法會房屋事務委員會及發展事務委員會聯合會議及公聽會,仲曾經同13名議員到橫洲視察。呢個議案首先被否決。

繼而喺傍晚有關港珠澳大橋管理局因興建港珠澳大橋主橋而招致嘅負債情況、交通流量估算等提供證據等2條議案亦遭否決埋,仲畀建制派議員鬧佢濫用立法會。5條傳召官員嘅議案,3條遭否決,餘下2條下周大會審議,相信都係凍過水。

其實,朱凱廸近日都黑氣纏身。日前民協前立法會議員馮檢基(阿基)宣布放棄就民主派於立法會九龍西補選擔當「Plan B(後補人選)」,仲大爆遭進步民主派阻撓佢以後備出選。由於朱凱廸曾喺社交網站發貼,話唔同意必須跟隨初選機制,又話若阿基出選將會「全城喊打」,結果被質疑佢就係嗰位進步民主派。朱凱廸最後要兩度道歉,而傳統泛民當然冇幫過拖。朱凱廸接連出怪招,但都搞到一鑊泡,真係自作自受喇!


來源 source: http://hk.on.cc
鍾意就快D Share啦!