牌品可以睇到一個人嘅人品，喺袁詠儀（靚靚）嘅麻雀腳裏面，佢就覺得老公張智霖嘅牌品no.1！靚靚接受《蘋果》「閃耀人生女人心」連載專訪講到打麻雀，雖然那些年曾經鬧爆老公，可以同沈嘉偉、郭富城一個禮拜打足7場，但靚靚就勁讚老公好正：「我講一個例子啫，我真係好記得，俾我就拍枱㗎喇！俾我走㗎喇起身！」
話說有次Chilam打台灣牌自摸百幾番，嘩好開心，俾晒錢洗緊牌，突然對家就話：「喂！唔係喎，好似打錯骰喎！」因為下家嗰個人成日出錯，下家就話好似真係出錯喎，大家就話咁咪唔計囉。靚靚諗番都好肉緊地講：「我喺隔離打緊第二枱，好想睇下佢哋點處理，我老公無出聲嘅，因為佢贏吖嘛。講真一句你俾我呢，俾咗錢喇喎，你無得唔算㗎喎，係咪先？」
但Chilam就唔係咁處理，靚靚眼神冧爆讚老公：「我老公竟然係打開個籌碼（派錢動作），咁好啦唔緊要，家家有求，再打過再打過。打完晒牌我返到屋企，我話：『老公，我覺得你真係好正呀！』如果發生喺我身上，我企喺身就走囉，喺我嚟講唔係個錢，而係你嘅錯，你輸咗就係輸咗，無得再拗㗎嘛，所以我覺得打牌可以睇到人嘅性格，因為我見過有好多擲籌碼、攞去啦嗰啲咁，我以後就唔同嗰啲人打喇。」
靚靚有一套打牌哲學：輸還輸呀，唔好輸到要借籌碼就得。佢得戚話：「通常我又好幸運地，頂多都係輸到無籌碼啫，我就唔使借籌碼嘅，我個心態就係覺得，亦都唔需要嬲嘅，因為坐低呢一刻，已經係娛樂嚟，你去娛樂都要俾娛樂費啦，咁今次你輸啫，唔代表下次你都輸嘛，如果我輸十次，我會同朋友講，呢排輸得好緊要，抖抖先，過一排我就再打囉。」
問到圈中有冇真心朋友？靚靚話：「咁我有好多真心朋友，伍詠薇、楊采妮（Charlie）、（李）心潔，好似心潔呀，我唔係成日見佢，特別佢家生咗小朋友，但佢返港我哋會傾心事，Charlie都係啦，我鍾意咁樣囉，我唔信個個都係best friend嗰啲囉，我覺得只係得幾個真正嘅。」
至於圈中最欣賞同敬重嘅人，就首推周潤發，靚靚表示：「我真係好欣賞呢位演員，佢真係能屈能伸，乜嘢劇本乜嘢角色都可以將自己放入去，有時演員可能好主觀地覺得，做唔到嗰樣嘢就係做唔到，我係啦，但發哥話俾我哋聽，係可以嘅。」點解唔去學去嘗試呢？靚靚坦言：「有啲嘢我又真係說服唔到自己去做，例如前嗰排有一個戲，我覺得嗰個年齡同埋嗰個感覺，唔係我呢一刻嚟，我話真係覺得自己唔得，咁我就推咗囉，因為我覺得要做適合自己，我唔係話一定要fit晒袁詠儀個性格，而係例如你個年齡層呀，你嗰一排個感覺呀，係點樣嘅時候都好緊要㗎。」
採訪：陳月媚
協力：倩宜
攝錄：馮峰、卓振輝、吉吉
攝影：林德雄
化妝：Kerry wong
髮型：Sam Pan＠Muse Hair
場地：好酒好蔡
【閃耀人生女人心(13)】為H字頭包包瘋狂 靚靚分享美魔女護膚絕技
http://bit.ly/2sHqTR6
【閃耀人生女人心(12)】唔怕向華勝最驚哥哥 袁詠儀後悔推搪梅姐飯局
http://bit.ly/2CayqLQ
【閃耀人生女人心(11)】同成龍星爺傳不和 靚靚認儍親解《國產凌凌漆》內幕
http://bit.ly/2EINDBO
【閃耀人生女人心(10)】靚靚帶隊重遊小學 自爆13歲初戀錫錫點到即止
http://bit.ly/2Fg97ad
【閃耀人生女人心(9)】爸爸嗜賭曾寄人籬下 袁詠儀感謝母親管教嚴
http://bit.ly/2EDOMul
【閃耀人生女人心(8)】警察宿舍出世成長 袁詠儀夾埋阿哥打鄰居女孩
http://bit.ly/2o7QDky
【閃耀人生女人心(7)】唔識語言藝術得罪人 靚靚被雪成就影后路
http://bit.ly/2F5KCw7
【閃耀人生女人心(6)】經歷選港姐勾心鬥角 靚靚一心攞亞軍：我係張曼玉
http://bit.ly/2EEyLaP
【閃耀人生女人心(5)】老婆坐月Chilam照蒲 靚靚產後抑鬱險離婚
http://bit.ly/2HdEqmD
【閃耀人生女人心(4)】坦認女追男 靚靚呻俾老公食住：張智霖係唔會錯㗎！
http://bit.ly/2H9XvWy
【閃耀人生女人心(3)】狂造人望追多個女 靚靚人工受孕：我卵子已老
http://bit.ly/2CfW45g
【閃耀人生女人心(2)】懷疑魔童自閉過度活躍 靚靚陪睇心理醫生原來係...
http://bit.ly/2EinZDx
【閃耀人生女人心(1)】靚靚管教太嚴愛操控 魔童：我想換個新媽咪
http://bit.ly/2EkPJY1
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|