歌手江若琳（Elanne）與未婚夫蕭潤邦（Oscar）日前到林村揀年花，順道寫揮春應節。小時候曾跟爺爺學書法的Elanne搞笑寫「$滾來」，即被Oscar笑不認真，又責怪她用符號代替「錢」字，然後他就稍為正經寫「吉住過狗年」。雖然兩人大耍花槍，但其實二人在鏡頭前後都像連體嬰一樣甜蜜！受訪時，Oscar自爆曾經因為沒送花而激嬲對方，Elanne初時否認發嬲，但隨即又從實招來：「嗰次係好特別嘅紀念日，佢份人唔浪漫我都講過好多次，但冇諗過唔浪漫到呢個境界，都係幾重要嘅節日。我諗住有一支花都好開心，跟住係乜都冇嘅。（咩紀念日咁重要？）相識3日，我哋逢3日慶祝1次！」
蕭潤邦唔識浪漫
自此Oscar任何節日都買花，包括過去不久的聖誕和新年，笑言想重陽節也繼續送，以免未婚妻不開心，但慶幸她並不是大發雷霆：「可能唔出聲囉，或者同我講好委屈、唔開心。嗰日佢以為我講個藉口出去安排好多嘢，點知見到我上載張相真係做緊嘢。」自從他們養貓後，Oscar就正式「甩難」，Elanne擔心貓仔對部分植物敏感，買年花前都做足資料搜集：「我每年都習慣擺桃花喺屋企，但依家好似唔使啦，一大棵喺度，或者改買桔。」她甜笑表示不用訓練Oscar成為好男友和好老公，因為對方只有不太懂浪漫這個缺點。
合力執屋
問到可會一起布置家居？Oscar笑言：「我哋聖誕會擺聖誕樹，中秋節會搵月餅，端午節會爬龍舟，新年會貼揮春，佢寫毛筆字好勁，有時都會寫毛筆字貼喺屋企。」Elanne大笑指他把話題愈扯愈荒謬，Oscar才稍為正經指二人會合力執拾家居，但他與Elanne做家務的比例是9比1：「我見到少少嘢就好想清潔咗佢，佢會想儲埋一次過做。因為我做飲食，唔通等10舊垃圾先清？客人會投訴。」Elanne笑指其實是9.5比0.5，掃地、抹地、吸塵和洗碗等全由未婚夫負責。問到她可會內疚？Oscar即幫口：「我以前喺舖頭一日做無數次，返到屋企一日做一次已經好舒適，同埋屋企清潔都簡單，佢做嘢又辛苦，呢啲要用力嘅嘢就等我做。」
爺爺是書法家
提到爺爺是書法家，Elanne自嘲失禮，因為已忘記爺爺教她的技巧。至於寫揮春時被Oscar挖苦，Elanne形容對方不挖苦自己就不安樂。Oscar笑謂：「我激發佢啫，佢學咗咁耐又唔正正經經寫，我冇學過竟然咁正經。通常收數嗰啲可能未識寫個『錢』字咪用符號，但你有好多年造詣。唔緊要啦，下次寫過。我哋有時都互相提點，係生活嘅一部分，佢唔會嬲，如果佢嬲就會嬲出嚟！」
場地：強記花園
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|