林利要惡過腸癌：不怕死 未驚過
前小虎隊成員林利自揭患上腸癌第三期，腫瘤達11cm，手術後肚皮有五處傷口，視患癌如「孭仔」，在「坐月期」忍痛連開三場騷的他，揚言不怕死，要用正能量克制癌魔。正如其歌曲《伴我啟航》歌詞一樣：「身經生死戰，心中閃正義光」。
現年51歲的歌手林利月頭才分別擔任胡渭康和黎小田的演唱會嘉賓，在共三場騷中以前小虎隊成員名義又唱又跳，原來開騷前，他曾靜靜地跟癌魔搏鬥，做了長達三小時多的微創及剖腹手術，將11cm長的腫瘤「剷除」。昨日林利受訪時詳談抗癌經過，指半年前發現大便有血，起初以為是痔瘡，但去年9月一照下發現患上直腸癌三期，於1月24日入聯合醫院做手術，他說：「原本喺肚臍上面開四個窿做微創，但發現個腫瘤太大，要喺肚臍下再開多刀，好似女人生仔一樣，依家我好似生完BB坐月咁。」
手術後經常如廁
手術至昨日剛剛一個月，現他的肚皮仍貼滿紗布，約兩吋長的縫針傷口清楚可見。問傷口是否仍劇痛？他直認：「都會痛，盡量唔食止痛藥，忍住，啱啱做手術後，我都係打咗一次嗎啡止痛。」又指於1月29日出院，三日後就擔任胡渭康和黎小田演唱會嘉賓，他說：「一個係兄弟，一個係恩師，點都要去，都係唱幾首歌，唔係咁難，上台時好似有神助咁唔得記得（痛），但一落台個肚就唔舒服。」
問到康復進度如何？他覺得已「痊愈」：「冇事o架啦，接受咗檢查，我抗體好勁，癌細胞冇擴散到淋巴、全身就好安全，唔代表唔會翻發，但依家冇，所以化療、電療都唔使，連藥都唔使食，雖然我唔係專家，但危險性好微。」他又指現時虛不受補，切了腸某部分後消化系統有變，經常要如廁，故打算稍後再服食中藥。林利一向早睡早起，且飲食清淡，今次突然被香港第二號殺手腸癌侵襲可嘆「唔好彩」？他淡淡然說覺得跟身體勞損有關：「冇話唔好彩，身體操勞咗五十年，又大陸、台灣周圍走，又應酬又拍嘢又食嘢，好多嘢積聚所致。」
「個肚花咗有男人味」
當初聞患癌時可想過死亡？篤信佛學的他自言未驚過，對生死很豁達，自認是安然的人，覺得遇上挫折或痛苦，可能是上天給他一個指引，加上自有一套對付癌病的信念：「癌係好得意嘅，你愈驚，佢就愈嚴重，因為你心情唔好，抑鬱嘛，要真係唔怕，唔好只得把口講，要真係唔怕，咁佢會畀你克制住，我當呢個癌係個人仔喺我身上，當佢係一個生命，我要克制佢。」亦因他凡事處之泰然，故入院事宜由自己獨力安排，入院前才通知家人，連林媽媽都表現堅強。提及看見肚皮「無撻好肉」，他笑笑口說：「個肚花咗可能更有男人味，當係一個記號，警剔自己小心飲食。」
第一個通知胡渭康
問林利可會取消工作好好休息？他卻嫌休息時間太多，指剛簽了邵氏的30集劇集，將於4月在港開工，期間也接了不少登台騷，他強調：「雖然唔係等錢使，但我唔可以坐咁耐0架。」他手術後即擔任胡渭康演唱會嘉賓，當時胡渭康曾戲言林利：「佢真係好兄弟，今日病，割完包皮都撐我」，全因胡渭康是首位得知林利患癌的圈中朋友：「我打畀佢（胡渭康）同佢話，以前我哋年少氣盛時啲恩恩怨怨算數啦，佢都好鼓勵，關心我。」
文：音樂組
|
鍾意就快D Share啦！
|
|
|
