熱爆娛樂: 九叔家族忽然有景 [壹週刊 - 1462

2018年3月15日星期四

九叔家族忽然有景 [壹週刊 - 1462 - 財經] __,M1,

▲ ORC 100位處中環街市後面。

中環人語

九叔家族忽然有景

環街市正進行活化工程，喺正對面的 QRC 100認真夠運，呢幢商廈由一代中環釘王羅肇唐（人稱九叔）的裕泰興家族持有，政府招標中環街市之時，班地產佬都估會拆卸重建起高樓。

九叔家族幢 QRC 100望到海皮少少景都被遮擋，不過政府招標結果竟然是予市建局活化，九叔家族真係忽然又有景啦，持有此商廈的是九叔次子羅守輝，手風都幾暢順，積極掃商廈、民生區的鋪位，今年首季已斥資六億元入貨；佢老哥則鍾情特色單位，原本自住的半山名廈嘉慧園，幾年前斥資億半買埋對面單位，所謂千金難買相連屋，打通兩個單位後價值更上一層樓，前財爺梁錦松在愛都大廈的相連單位，都係同羅守輝買㗎！

羅肇唐之孻仔羅守耀

羅守輝

中環街市活化工程現正進行中。

新地調理農務

新地位於西貢十四鄉的地產項目，去年以一百五十八億元補地價，每呎樓面價為三千三百元。

九巴炒車死人到炒車長呢壇大龍鳳，作為大股東新地（ 16）都咪話唔頭痕，新地主席郭炳聯可能都好想歸園田居，清靜一下，聽講新地喺西貢十四鄉塊農地，去年創本地史上最高補地價金額一百五十八億元，項目規模媲美嘉湖山莊，有近十九萬呎康樂設施，其中一項是搞農務，聽講新地從日本京都找到顧問，聘請稻米專家，喺度搞個有機農莊種米，利用馬鞍山山水開墾稻田，發展商竟然務農？真係大新聞；不過日後務農一段時間後，會否再將塊地轉做其他發展用途呢？莫非務農是 buy time！

The Murray勾起高官照肺回憶

「中環寸嘴」楊國佳贏馬之後接着慶祝其六十一歲生日，莫非是「人頭馬一開，好事自然來」咁老套嘅爛 gag，佢老哥話揀新開張酒店 The Murray舉行生日晚宴，呢幢酒店前身為政府總部美利大廈，寸嘴楊謂純粹支持保育；賓客之中有政府退休高官，來到 The Murray有感而發，謂以往最怕到美利大廈，諗起都腳軟，通常有「杰撻撻」事情發生就要上去總部被上司照肺；寸嘴楊則說：「雖然生不入官門，以前我又怕咩去呀？係驚無資格去咋，家族搞工廠大廈時，有個建築佬醒我，謂由業主寫封英文信去美利大廈工務局最有力㗎！」

上週一是楊國佳的生日，選址在新酒店 The Murray的 Tai Pan餐廳舉行其生日晚宴，旨在予賓客新鮮感。

這棵在美利大廈的「風水樹」，特首林鄭特別要求保留。

楊國佳與妹妹同日慶生。

週日在中環士丹利街，見到兩位「精靈」仔著住件印有 KPMG嘅運動衫跟住父母逛，想入名校平時裝扮都要醒醒目目，如果唔係又點 impress到名校，睇真啲呢兩個仔阿媽係以前 2R組合 Rosanne，老豆係牙醫 Baram Derek James白恩庭，唔少闊太為了自己寶貝仔女，都指定去中環呢間 Central Smile牙科診所，特別是牙齒矯正，收費梗係頂級啦，但勝在儀器夠先進，一提起 2R嘅 Rosanne，就話佢嫁咗富貴名醫，不過可能未必及炒鋪天王嘅牙醫冼仲彥搵得咁和味。