祖兒首談分手：太多事處理唔到！
樂壇天后容祖兒與劉浩龍相戀5年，最終未能修成正果，分手收場！祖兒自爆出分手後昨晚首次出席活動，有備而來的她多次不回應分手一事，但直言：「最近太多事情發生，我都處理唔到！」另邊廂，劉浩龍則約腳踢波發洩。
容祖兒、劉浩龍（師兄）的戀情一直被外界視為「女尊男卑」，不被看好，惟5年來祖兒依然努力經營這段「龍兒戀」，而日前本報收到消息，獨家披露「龍兒戀」正式畫上句號，原因是祖兒需全副心思照顧患病媽咪，未能兼顧兒女私情，她與師兄在取得共識下和平分開。
Status係努力工作
自分手消息爆出後，昨晚祖兒首次出席公開場合，打扮靚靚的她全程笑容滿面、態度從容，明顯有備而來，問到心情是否好好？祖兒說：「幾好，唔錯。（感情事係咪放低咗？）你哋講嘅嘢我唔回應。（傳聞中分咗手？）唔……我唔回應好啲，唔想講咁多，唔想之後有更多新聞，平時私人愛情生活唔習慣拎出嚟同大家講，通常留畀自己處理。」再追問現時Status（感情狀況）是單身還是交往中？她即迴避說：「我依家個Status係努力工作中。（多咗時間工作？）係要多啲時間工作。（但之後都會掛着師兄女友身份？）呢刻都係唔多講，以我經驗，講同唔講大家都會繼續寫，我唔講好啲，多謝大家關心。（係咪想放多啲時間照顧媽媽？）唔回應喇。」
互相關心扶持
祖兒對分手一事，直言沒有特別補充與交代，之後轉話題表示稍後會出兩張唱片，要飛到台灣、內地等。「龍兒戀」雖然已分手，但再見亦是朋友，祖兒還不忘扶持師兄，指他忙於籌備演唱會：「大家互相努力，關心大家，支持大家係最重要。（你哋係咪年頭之後就冇見面？）唔係，太誇張啦。」談及老闆楊受成曾經講過，希望愛錫祖兒的人沒有其他目的，她說：「從來冇人對我有目的，大家都係愛錫我！」問到是否已準備迎接新戀情？祖兒即暗示感情確實起變化，說：「太多事情發生，我都處理唔到，要努力工作先。」
此外，談及有網民指今次「分」訊是為劉浩龍的演唱會宣傳？祖兒即反問：「你哋覺得咁樣係得o架咩？大家都係現代人，呢啲唔係拎出嚟講，總之係互相支持嘅狀態。（拍拖時受好大壓力？）唔回應咁多。」活動後，祖兒換上另一套服裝，笑容滿面地離去，現場有保安與助手開路，祖兒在助手陪同下上了七人車，座駕直駛灣仔英皇駿景酒店。
文：名人組
攝：追蹤組
|
鍾意就快D Share啦！
|
|
|
