婚後的劉綽琪，對家事一直低調，直至近日回流，才被揭喪夫一年。
探熱針
短暫的婚姻 堅持下嫁患癌老公
喪夫劉綽琪：佢遺願要我開心
與佘詩曼同屆的 97年落選港姐劉綽琪，十年前退出香港娛圈，返美定居，轉攻荷里活，更於 15年下嫁老外。不過本刊收到消息，劉綽琪只擁有短暫的婚姻。婚後兩年丈夫患癌病逝。求證劉綽琪，承受喪夫之痛的她，說為圓丈夫遺願，會選擇堅強生活下去。 43歲失伴侶的她，近日回港兼顧幕前幕後，重新出發。
婚前已患淋巴癌
昔日在大台拍劇兼主持的劉綽琪，之後轉投亞視，至○八年決定離開返美發展，一直參與荷里活的製作，鮮有在港露面。
不過上週日（三月四日），本刊發現在洛杉磯定居十年的劉綽琪孖好姊妹張文慈在又一城飲茶，兩個不停有講有笑。但本刊收到消息，單拖回港的劉綽琪，原來剛收拾喪夫之痛的心情。一五年她在網上宣布二月結婚，據悉她下嫁歐洲籍男子，但婚後只享受短暫的甜蜜時光，丈夫因患淋巴癌於去年初病逝。原來婚前已知丈夫身體狀況，愛得義反顧的她，仍堅持下嫁對方，一起珍惜每分每秒。
停工共渡最後時光
「其實婚前 Patricia（劉綽琪）已經知道男友患淋巴癌，對方係佢 one life one love，佢堅持結婚。不過婚後一年，老公病情已去到幾嚴重階段，老公拒絕再接受任何治療， Patricia只能尊重佢嘅決定，當時正值 Patricia喺荷里活好多機會，但佢想專心照顧老公，所以放低曬手頭工作，珍惜同對方剩低嘅時間，嗰段日子佢兩公婆周圍去，好似度蜜月咁。」知情者透露。
半年時間收拾心情
14歲經歷過母親自殺，婚後的劉綽琪再一次失去生命中重要的人。知情者續說：「雖然一早有曬心理準備，但畢竟去到嗰一刻，都會唔捨得而傷心。不過 Patricia細個嗰陣經歷過媽咪自殺，令佢面對老公離逝都比一般人硬淨，冇封鎖自己喺悲慟嘅情緒，好快重返正軌生活。」
翻看劉綽琪 facebook，密密出 po的她，卻在一五年十二月後突然真空大半年，一六年十月她返港出席老友楊怡的婚宴，原來當時的劉綽琪正面對丈夫病重的痛苦。
「 Patricia份人好樂觀，佢話人生能遇到呢個最愛，又同佢開開心心度過最後時光，已經無憾，加上佢有信仰，相信日後可以天家見番，所以更加無悔喺世上日子，同對方做短暫夫妻，佢話會好好咁生活落去，唔想令喺『上面』嘅老公擔心。」
劉綽琪：用時間調節自己
本週二（三月十三日），記者向劉綽琪求證喪夫一事，起初有點錯愕的她，停了幾秒才答：「要發生都發生咗，冇乜必要再提。」問她現時心情，她說：「任何人遇到呢啲事，都識用時間去調節，幸好我天生比較開朗，又好早經歷過家人死亡嘅事，所以對生死都容易放得低，有心理準備，所以唔會受太大情緒影響，冇乜大改變，唔使擔心。」
問她丈夫臨終前有冇遺願，她說：「要我開心！」
為完成丈夫的遺願，劉綽琪過得積極。
不幸童年母親上吊自殺
劉綽琪出道不久，身世被揭。早在 14歲那年，已經歷喪母之痛。其母在家上吊，劉綽琪曾在訪問中憶述，母親尋死當天，她上學時心緒不寧，更無故哭起來，大抵是兩母女的心靈感應。她說：「放學返到屋企，見到媽咪……（做了一個吊在半空的比劃），當時佢全身已僵硬，應該已經 dead咗幾個鐘，之後我好冷靜咁打電話報警同通知家人，直至辦好媽咪喪禮，我先崩潰。」
雖有不幸童年，但劉綽琪沒將此視為絆腳包袱。「十至二十歲那時我係最難受，每當憶起媽咪都好難過，但時間係好好嘅治療方法，我真正放低係入行後一、兩年，人生沒可能讓陰霾綁住自己一世，我唔想被它綁住，唔想逢過時過節就唔開心。」母親離世後半年，其父把她接到美國，與他第三任太太同住，但最後劉綽琪選擇搬離，與好友同居，成長造就她硬淨獨立的性格。
回流大展拳腳
08年離開香港到美國闖的劉綽琪，十年間拍過唔少荷里活短片及處境劇，近日回流再活躍，有指她主力為外國演唱會及音樂劇任中介，打入亞洲市場。
求證她的新工作，劉綽琪說：「一路有人搵我返嚟拍劇，但時間較長，當時唔方便行開咁耐。依家返嚟有 project搞，幕前幕後都有。喺荷里活浸咗一段時間，佢哋希望透過我將一啲製作帶入內地市場發展，其中音樂劇正籌備中。」
年輕喪夫
圈中不少藝人年紀輕輕就痛失另一半，雖傷心欲絕，但仍堅強面對。
撰文、攝影：娛樂組
|
鍾意就快D Share啦！
|
|
|
