法律界有個「法律界馬海倫」——容海恩，嗱，唔好講靚唔靚啦，但正版——馬海倫，就一定係索。
家中獨女嘅馬海倫，屋企做船務生意，16歲參加邵氏舉辦嘅「香港玉女」選舉勝出，係真真正正嘅「玉女掌門人」。中五畢業之後先至入行。當年喺佳視嘅《流星蝴蝶劍》、《仙鶴神針》都深入民心。
馬海倫一向做開靚女、俠女角色，不過近年觀眾對馬海倫嘅認識，就係做綠葉，有時甚至要扮醜……已屆70歲馬海倫曾話過，佢係完全唔介意做騎呢角色：「汪阿姐都要做人阿媽啦，冇可能仲紮兩條辮仔去撲蝶0嘛，你出嚟自己都反胃」
89年離婚之後，馬海倫一直保持單身，得閒打下golf，注重養生之道，日日食兩湯匙花膠，飲食少鹽少油。佢話過：「好怕啲男人條褲『dum』喺個肚腩下面，真係好核突0架！」馬海倫真係一直keep住好弗嘅身形。
不言退嘅佢，依家開緊新劇《逆緣》，閒來去下shopping。日前下午四點左右，馬海倫就喺利園Theory置裝，發現佢嘅時候，就一個人坐喺度，已經揀好晒戰利品，坐咗喺度簽嘢，應該就係留底地址送貨。
簽卡埋單嘅時候，只見馬海倫同店員密密傾，應該係熟客。埋單之後仲傾咗近二十分鐘，之後兩手空空咁行出嚟，應該係留地址送貨喇。Theory一向講求極簡主義，都會感重，係唔不少OL穩陣之選，允兒、秀智同吳佩慈都係捧場客。
| (採訪、攝影：梁繼光) | | |
| | | |
來源 source: http://hk.entertainment.appledaily.com
|
鍾意就快D Share啦！
|
|
|
