天王黎明認做老竇，全城都讚佢係找數真漢子！細黎明19年嘅女助手Wing傳懷「明種」超過6個月，呢個核心嘅外圍，即係子宮內圍嘅問題，我Nuts哥完全唔擔心黎明會消失扮傻零交代！佢再次發揮快狠準嘅公關伎倆，搶閘早過六點半新聞報道，喺Facebook專頁定調：「小生命令我成為父親！」一夫當關，主動釋除公眾疑慮！
造人要有人品！
BB左手又係肉，手背又係肉，係咪空肚做老竇，對黎明嚟講好緊要，因為關乎貞操問題！當年樂基兒被砌生豬肉話有餡，立刻觸動黎明神經並神回：「如果唔係真就係強迫，如果係強迫即係非法男女行為，亦即係強姦，我一定要捍衞我嘅貞操！」簡單啲講，一滴不漏，就真係一滴不漏，嗰滴係乜？唔係仲要問嘛？今次佢認做老竇，同樣都係捍衞貞操，話畀大家聽冇強迫，係合法男女行為，兩情相悅，真心「付出」，即係BB都係「合法」製造，認祖歸宗，黎家有後呀！
行動支持唔使講嘢
黎明向來將私生活全面低調處理，連做善事都要密冚，天知地知冇人知，但係以佢超級有責任感嘅性格，單講佢女友因為「與神同行」，粗身大勢被瘋狂起底，諸多揣測估到去汕尾以南，佢唔企出嚟講嘢，仲係男人？有責任感都唔係大隻講，正如佢做影視娛樂大使嘅口號一樣：「行動支持唔使講嘢！」佢冇話求其租個單位收埋女友玩金屋藏B，直情畀埋入宮住上水豪宅貼身照顧，就知佢堅係家庭計劃，男子有責佢話過：「飲酒要有酒品，影相要有相品。」做乜都要有品，即係「造人」都一樣要有「人」品！做得出，怕咩認？條數找硬！點解唔認先？好過有啲天王級藝人，同老婆十指緊扣畀人影埋都唔出聲，連外父都唔肯認，最後死狗道歉咁肉酸
生B好似打波入樽咁，理鬼你喉嚨痛聲沙啞，一「樽」就搞掂晒！唔好理黎天王係咪去年「煙花」特別多而成功「入樽」，只知依家葡萄同眼鏡碎都係特別多，一地都係！來自五湖四海嘅「黎太」喊咁口留言送祝福，忍着淚說Good job，另一邊話估唔到一個零光環、屋邨出身嘅女仔會變天王嫂，又一個都市童話，好一個摘星奇緣！以黎明以往嘅戰績：金喜善、王菲、李嘉欣、舒淇同樂基兒，如今女助手成功埋單，暴富做天王嫂，猶如中六合彩！黎明嘅口味真係幾佻脫，同佢啲金句一樣估你唔到，變幻莫測，唔少口痕友話佢係咪離婚重創搞到味覺失調、又話豬八戒食咗唐僧，真係難聽過粗口，唔使咁講嘛？
天王隨時做埋外父
型佬如黎明雖則向來唔似Family man，但喺佢心目中就似拍拖一樣，同見鬼同樣係要講緣分，既來之則安之。偶像都係人，都要呼吸食飯沖涼生仔結婚，後生如Chef Le Mon謝霆鋒都有兩個仔黎明只係51，有心有力都好正常！依家全城競猜佢會唔會同兩大天王張學友、郭富城一樣生女變「三大外父」外，最期待都係佢有乜湊仔金句，唔知BB係咪一出世就準備做地球人、朝早空肚飲奶、肥過部電單車呢？
|
鍾意就快D Share啦！
|
|
|