【旺角】
現年29歲的「E Cup Baby」劉欣宜由𡃁模轉行變空姐，前年嫁音樂人陳子敏後火速成功造人，兩人的愛情結晶B女將於5月出世。日前大肚劉欣宜孖老公恩愛出巡，陀B後上圍谷奶更勁升一cup，快為人母的她專掃BB減價用品，十分慳家。
擁34E驕人身材的劉欣宜有朵叫「E Cup Baby」，當年憑影性感寫真上位，惟𡃁模生涯一場夢，短短四年已逃離娛樂圈轉做空姐，前年嫁專唱二創歌曲組合窮飛龍成員、現正職是理財規劃的陳子敏，去年底兩人造人成功，小公主的預產期是5月，日前肚大如籮的劉欣宜在老公陪同下，拍拖到旺角掃平民BB用品，十分貼地。
環保「啱用先買」
日前黃昏約6時，劉欣宜和老公着情侶牛仔布恤衫出巡，大肚後上圍勁升一cup的她，幾乎撐爆tee。劉欣宜跟老公十指緊扣走入旺角某商場的嬰兒用品店，兩人睇勻場內的BB手推車、嬰兒衫仔等，尤其對一張多用途high chair十分有興趣，這張椅除方便父母給BB餵食，又可以讓BB躺下，見到陳子敏十分細心地跟老婆講解。
兩人對睇中的BB用品仔細研究，細閱物品的質料，剛巧店中進行減價，快為人母的劉欣宜十分慳家，錫住老公荷包優先選擇減價貨，相信是因為家中即將添新成員，開支大增要知慳識儉。掃貨期間，劉欣宜突然用手摸肚，似乎是小公主在郁手踢腳，陳子敏即暖男上身安慰老婆。兩人揀了45分鐘左右，最後由陳子敏埋單，劉欣宜則逗玩排隊旁的約兩歲小朋友，母愛氾濫。
日前記者聯絡劉欣宜，她說：「咁啱老公得閒，就出去買定BB嘢，差唔多要準備，好多嘢要買都好頭痛。」提到專揀減價貨好慳家，劉欣宜坦言：「我會睇品質，畢竟BB大得快，啱用先買，唔想嘥，要環保。」現陀B八個月的劉欣宜透露重了十多磅，懷孕初期更孕吐嚴重：「又頭痛又胃漲，一直嘔到五個月，呢兩個月先食到嘢，一餓就唔舒服，老公都擔心我身體唔好，唔畀我一個人出街，盡量佢會陪我。」
老公寫歌畀B女
劉欣宜坦言懷孕後不但飲食口味改變，情緒變化也好大，幸好有老公錫到燶，將兩母女照顧得好妥貼。由於兩夫婦都愛音樂，已計劃送一首歌給囡囡，她說：「我叫老公儲住心情，有靈感就即寫歌。」提到她谷奶上圍更澎湃，劉欣宜尷尬笑說：「咁密實都睇到。」臨盆在即的她心情好緊張，並透露計劃自然分娩，自己會餵人奶，將最好的給囡囡。
採訪、攝影：徐錦池、孔志豪
|
鍾意就快D Share啦！
|
|
|
