今日肯定是良辰吉日，繼羅力威、雨僑結婚，62歲的歌手陳美齡（Agnes）今日都娶新抱，婚宴設於中環私人會所，穿上紫色晚裝的Agnes黃昏時，與其31歲大仔金子和平和新抱Lucia Chung會見傳媒，最搞笑本來訪問安排在會所外面的公園進行，不過因公園對開一條路逢假日實施行人專用街道，Agnes見到寬闊的馬路開心說：「好香港呀！」
Agnes受訪時說：「今日心情真係好開心、好興奮，個大仔之前已經去咗台灣同日本擺酒，今次嚟到香港，最後一站喺美國7月7日舉行，到時主要招待個仔同新抱啲同學、朋友、同事。」
親自布置婚宴場地
Agnes表示今晚會擺16圍，主要邀請親戚朋友，她更為婚宴場地親自插花布置：「啲花自己插嘅，尋日攞晒啲花返嚟插完好成功，啲仔有幫手，但就因為有幫手，搞到盆盆花都唔同樣，有啲好靚，有啲就吾......（佢哋唔係跟住Sample嚟插？）唔知點解，插出嚟怪怪哋，到時咪分到邊啲我插，邊啲唔係我插。」
送家傳之寶給新抱
Agnes又送了家傳之寶給新抱，她說：「我送咗條頸鏈畀新抱，嗰條頸鏈係我結婚時奶奶送畀我，依家佢係大新抱，我就送畀佢。（你媽媽出來一齊影相嗎？）本來佢都會落嚟，不過媽媽有啲唔係太舒服，今日唔落嚟，費是吹風。」
抱孫愈多愈好
Agnes表示大仔跟新抱明日就走，不過Agnes就會留港工作，問到她可會心急抱孫，催他們生B？Agnes客氣說：「聽阿仔口氣話新抱都諗緊，最緊要個新抱肯諗，個仔諗就冇用。（想要幾多個孫？）梗係愈多愈好，又唔係我生，孫呢啲嘢多就好。（你幫手湊？）如果佢哋肯畀我湊係好，因為我好鍾意湊小朋友嘅，我以前剩係得湊仔心得，睇嚟嚟緊我有湊孫心得，真係好感恩、好高興，個新抱好善良、好純品、好堅強，娶到咁好嘅新抱非常之好，自己可以交帶得落。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
