羅力威、雨僑今日行禮，兩人剛剛出來接受傳媒訪問，一對新人應傳媒要求，即場錫錫，非常Sweet！一對新人暢談今早簽字註冊情況，羅力威更即席發表愛的宣言，羅力威透露今早8點半就起身化妝整頭準備，今午婚禮一共邀請了二百多位賓客，他說：「呢個場最多請220人，我都請晒，只係有十幾人冇嚟，都好理想。」
羅力威表示本來今早要為婚禮進行綵排，但因好多事預計不到，原本早上十一點行禮，結果遲了半小時，雨僑則說：「我就只係準備，唔使綵排，點知我出到嚟，先知佢哋連綵排都冇。」不過整個註冊儀式及婚禮非常順利，羅力威說：「所有嘢比想像中更完美，喺冇綵排情況下，天氣又配合得好好，Live Band時間攞得好準，成個婚禮進度良好。」
否認掟花球內定
至於新娘子雨僑掟花球，由陳嘉桓搶到，他們否認是內定，但就笑言陳嘉桓及譚嘉儀都想搶到，羅力威說：「佢哋個個都想攞。」羅力威又透露師姐容祖兒今早有到場恭賀他，他說：「非常感動，我公布婚訊時，佢已祝福我，而佢亦一早話我知佢會到，但就唔食嘢。（佢有冇帶師兄劉浩龍嚟？）邊個師兄？冇，我請祖兒啫嘛，我又唔識佢（指師兄）。」
問到行禮一刻他們可有感動到喊？羅力威說：「咁又冇喊，今日其實開心多啲，喊嚟仲乜，日光日白。（夜晚喊？）留番今晚飲醉先喊。」雨僑都好堅強冇喊：「係好感動嘅，不過我同自己講情緒要管理得好好，好開心、好難得見到咁多親友齊集晒。」
處處維護老公
問到羅力威可有向太太發表愛的宣言？羅力威坦白說：「冇講，你哋都知我唔講嘢。」雨僑就說：「有兩三句。」羅力威直言：「對佢算啦，我都唔係好慣對住佢咁認真講嘢，平時同佢講嘢傻更更。」記者打趣算他結婚都不認真，雨僑即護住老公說：「如果佢咁認真，我可能會笑。」
羅力威在記者要求下，隨即一口氣發表愛的宣言：「其實從今日開始我哋唔再係情侶，我哋係夫妻，我會用我最清醒頭腦，去令到佢嘅生活井井有條，唔會漏低嘢，唔會唔見嘢，我亦都會用我最大嘅氣力或者雙臂，去將佢嘅重擔同佢分擔，希望用我只有佢明我嘅邏輯，去發揮幽默感令佢開心，希望能夠一直拖住佢隻手到老，就算老咗都係keep住拖住，同埋出街keep住好多嘢傾。（雨僑插口笑話喺屋企冇嘢講！）因為係好難得，希望永遠同佢都咁啱傾、拖手到老，希望我哋用一直拍住拖嘅感覺去過結婚嘅生活。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
