無綫藝員馬國明、黃心穎、郭晉安、唐詩詠、袁偉豪、蔡思貝、蕭正楠、李佳芯、陳凱琳、王君馨、朱晨麗、張曦雯、洪永城、梁烈唯、朱晨麗等逾半百藝員在會展舉行的「香港國際影視展」出席《TVB 2018 戲劇綜藝強勢登場暨業務發布會》宣傳新劇及節目，新劇集包括《宮心計2深宮計》、《白色強人》、《多功能老婆》及請來「影后」惠英紅演出的《鐵探》、《法證先鋒IV》及與騰訊合作的大型合拍劇《衝上雲霄2020》。
窒到口啞啞
綜藝節目最令人期待要數新一輯《美女廚房》，主持換上蕭正楠、林盛斌（Bob）與張振朗。黃心穎在台上被阿Bob問到有甚麼拿手菜式，她取笑阿Bob說：「你生咁多仔女，我整牛鞭畀你食啦。」沒料黃心穎寸人不成反被窒到口啞啞，阿Bob望向馬國明笑說：「牛鞭我就冇興趣喇，反而想試吓你成日食嗰啲鞭啫。」
黃心穎聞言被窒得冇力反擊，甚為尷尬，同台的馬國明亦「鞭長莫及」冇力支援女友，也尷尬得「面都紅埋」，引來現場一陣爆笑。
驚對話出唔到街
馬國明與黃心穎一齊受訪，問到黃心穎被阿Bob串是否很尷尬？她說：「又唔係好尷尬，只係唔知點接啫！」問馬國明尷尬得面紅？他笑說：「唔係，熱啫，阿Bob不嬲都鍾意講笑，我哋好熟，我都玩得嘅。（說話太三級？）係驚條片出唔到街，但係現場氣氛就好好。」
馬國明食嘢唔揀擇
黃心穎讚馬國明愈來愈風趣搞笑，但否認受她感染，黃心穎甜笑對馬國明說：「你睇你個樣幾尷尬。」馬國明笑說：「我不嬲都係咁。」黃心穎相信會有機會上《美女廚房》節目，她笑說：「我未煮過嘢畀佢食，攞零食就有，我真係唔識煮，都想上去發揮吓小宇宙，煎蛋、炒菜、公仔麵都OK！」問馬國明可願意食一世黃心穎煮的公仔麵？他笑說：「接受到，我食嘢唔揀擇。」講到將開合拍劇《衝上雲霄2020》，馬國明指當然有興趣參與，但相信公司會找新演員拍攝，黃心穎笑說：「我都想拍一個角色，以前《衝上雲霄》好鍾意吳鎮宇，太有型。」
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|