為咗提高動新聞質素，電影大師班請嚟稱自己為「新晉導演」嘅杜汶澤演講，講吓點樣講故事。
杜汶澤認為拍戲係透過影像表達自己嘅鬱結，「我唔相信人無鬱結，無鬱結嗰啲通常都係白痴！」佢稱周星馳為「偉大嘅導演」，以佢為例子話，「周星馳就透過影像表達咗好多佢嘅鬱結，例如正義感、世界嘅唔公平等。」
| | |
至於最近杜汶澤自編自導自演嘅《空手道》，亦係表達緊佢自己嘅一啲睇法，主角鄧麗欣飾演嘅平川真理，其實就係投射緊杜汶澤自己，以及佢身邊遇到嘅人。杜汶澤話，「《空手道》係講一個小三點樣去重新做人，呢個故仔係嚟自我朋友嘅經歷，佢發現咗個女做咗人哋小三，佢話好痛苦，我就反思，係喎！大部份男人喺溝二奶嗰陣，都無諗過對方係有老豆嘅！」杜汶澤話佢仲有好多其他諗法想投射出嚟，「射極都有嘅！」
當有咗一個諗法想表達，點樣表達就係另一門學問。杜汶澤以《伊莎貝拉》為例子，「喺開頭嘅創作上，我哋有諗唔通嘅地方，我就提過彭浩翔，點解我哋唔怕鬼片呢？」《伊莎貝拉》原本係講阿囡尋父，杜汶澤就話，「戲中嘅我搞大咗人哋個肚，真係落咗，點知嗰隻鬼返嚟搵我，係咪易拍好多呢？彭浩翔都話係喎！」杜汶澤發現，原來無論設定梁洛施係人定鬼，拍親情故定鬼故，內容都可以一模一樣，只係表達嘅形式同方法唔同。佢嘅結論係，「如果作為一個講故仔嘅人，應該擁護嘅唔係自己想講乜嘢，而係講故仔嘅方法，就好似啲人成日話，從政最重要唔係講乜嘢，係點講！」
杜汶澤話點講故仔，其實好睇個人或機構嘅性格，性格足以影響風格。佢以《動新聞》為例，「你唔使睇，聽就得，一聽到旁白，就知係《蘋果動新聞》，把聲特別衰嘅。」佢又以成龍為例，「成龍就係一個好導演，無論你畀乜嘢劇本佢拍，佢都係諗喺邊層樓跌落嚟，『哎呀！好痛呀！』」所以，佢認為每一個表達方式，只要持久運用，就會形成風格。
《蘋果動新聞》一直運用幽默、搞笑、揶揄嘅風格，不過同事都希望更上一層樓，有同事問杜汶澤，「我哋嘗試做唔同類型嘅片，唔再係以前用衰聲讀旁白，但係你又覺得好似唔見咗啲嘢，中間我哋點去拿捏呢？」杜汶澤認為兩樣都做就得，「有時出下嗰啲，有時出吓呢啲咪得囉，讀者唔會一路睇住你，『嘩！一時咁一時咁，精神分裂嘅』佢哋唔會㗎嘛！」加上，佢認為《蘋果日報》不嬲都精神分裂，「因為唔係一個人做㗎嘛，有啲你同事做㗎嘛，你放假吖嘛，我畀親《蘋果日報》鬧，啲friend都放假㗎！」
至於有同事問到點樣可以喺講故事嘅舖陳上再進步，杜汶澤就認為《動新聞》已經做得好好，「唔好杞人憂天先得㗎！」
|
鍾意就快D Share啦！
|
|
|