【爆相爆片】人生有幾多個十年？現年31歲的陳家樂在娛樂圈捱足15年，最近憑無綫劇集《逆緣》彈起，但仍對去年發生車禍撞爆鼻骨的女友余香凝（Jennifer）不離不棄，日前更帶Jennifer見家長到酒樓開餐，家樂坦言父母對女友印象好好：「覺得佢幫到我！」
在03年參加英皇新秀歌唱比賽入行的陳家樂，曾經試過3年冇工開的黑暗日子，直至最近在無綫劇《逆緣》扮演「冷凍人」鍾定國成功入屋，終於出街有人認得他，不再只是一粒「暗星」。上位中的家樂沒有飛甩同甘共苦的女友余香凝，兩人拍拖4年大方公開戀情，日前家樂更帶女友見家長陪老人家食飯，被讀者陳小姐透過「爆相爆片」分享，甜蜜又孝順。
| | | |
着情侶波衫
陳小姐接受電話訪問表示，當日約晚上8時許，在馬鞍山的商場酒樓見到陳家樂和父母食飯：「成枱6、7個人，除咗佢（陳家樂）同女朋友外，其他都係長者，佢幫手斟茶又夾餸，好多人搵佢哋影相，有啲女仔，連阿叔都影，佢去埋單時，被阿叔捉住影相，佢好friendly，擺低嘢同阿叔影。」相中的家樂和女友着德國國家隊情侶波衫，翻看兩人的社交網，原來這天他們貼合照放閃，留言：「睇波點可以自己睇呀？」
記者問家樂是否帶女友見家長？他在電話表示：「唔係特別見家長，因為好耐都冇同嫲嫲食飯，其實好普通一個家庭聚會。」對於被食客爭相集郵大受歡迎，捱到出頭天的家樂坦言：「有人認得我哋合照好開心。」家樂還指女友跟他的家人經常見面，父母對她的印象很好：「佢哋覺得Jennifer好乖好上進，同埋覺得佢幫到我，我冇乜自制能力，有Jennifer喺度就可以令到我成熟啲。」
冇婆媳問題
問到怎樣沒自制能力？家樂坦言：「我唔知係咪叫大使，係成日唔知使咗去邊，出糧後又買結他又買相機，因為自己有拍嘢，見到新科技就想買，咁就用多咗啲錢。佢幫我好好咁管理我成個人，我要寫報告囉，每日話畀佢知啲錢用晒去邊度，佢都知我有時要同朋友、同事食飯，但要知道我用得係啱，普通食茶餐廳2、3百蚊都夠用。」
問到幾時計劃結婚？家樂說：「睇吓儲錢儲成點先，𠵱家首期都未有，努力啦，希望盡快發展人生下一階段。」他坦言女友跟父母關係很好，笑言將來一定沒有婆媳問題。
家樂和Jennifer於4年前合作拍港台劇《總有出頭天》擦出愛火花，兩人在劇中有甜蜜錫面場面，3年前不避嫌公開戀情，當時家樂更承諾將於5年內跟女友結婚；去年家樂駕車接女友放工不慎發生車禍，令到Jennifer鼻骨爆裂，家樂聲言會一生一世照顧女友，並送上鑽石戒指作為見證。
採訪：皓騫
|
鍾意就快D Share啦！
|
|
|
