「因為我哋屋企都唔係一個咁典型、咁簡單嘅家庭，所以而家會更加明白單親媽媽，因為就算而家有老公同我一齊照顧小朋友，我都覺得原來有佢嘅辛酸，所以更何況以前媽咪都係一個單親媽咪嘅時候，我會更加以欣賞嘅角度去睇呢個女性，因為真係唔簡單，因為喺照顧小朋友，喺教育上，佢當初又要工作，又要照顧我哋三個，而佢係一個單親媽咪嘅時候，呢種毅力同勇氣，好多人可能喺過程中會用好多理由、原因而放棄咗，但係呢種勇氣係好犀利。」
Emme今年34歲，睇住陳真長大，自己都有啲感慨。「我記得喺湊陳真嘅過程，第一次自己有少少觸動嗰吓，就係喺佢幾個月嘅時候，我就唱咗一首《小太陽》俾佢聽，嗰一刻點解我會喊，流咗幾滴眼淚？係因為《小太陽》呢首歌係我細個，我記得係幼稚園畢業時唱嘅畢業歌，三十年前嘅一首歌，我今日唱番呢首歌俾個仔聽，播番呢首歌俾佢聽，你就會發覺原來人真係有咗經歷，真係成長咗，已經去咗另一個階段，唔再係一個幾歲嘅小朋友，我已經唔可以再係嗰個時候嘅小朋友，因為我已經係一個媽咪，而我今日將呢首歌播番俾陳真聽，嗰一下自己毛管戙，嗰時係得自己對住陳真，兩個人喺屋企，原來時間真係過得好快。」
嚟緊母親節，有冇嘢想同媽咪講？「當然希望你可以享受每一日嘅生活，其實開始年紀大嘅時候，你會發覺人好多時執着，其實好多嘢都要放低，大家都係嚟呢個世界享受一次，就算任何好嘅情況，唔好嘅時候，我哋都要識得去享受每一日，陳真我都會咁樣教佢，今日好太陽你開心，就算落雨都可以喺雨中跳舞，人生都係咁樣嘅啫。」有冇嘢想同囝囝講兩句？「都無咩特別嘢要講，我成日都同佢講，而我亦都唔係好多嘢同佢講嘅媽咪，我相信喺我湊佢嘅過程，或者引導佢嘅過程，佢已經好清楚呢個媽咪係點樣，總之就醒啲啦。」
採訪：肥A
攝錄：蕭敬漁
化妝：Yannes Lee @ ndnco.co
髮型：Zap@ private I
場地提供：J’s Bar Bistro @ 帝苑酒店
立即按此連結Download:https://goo.gl/NVySCK
來源 source: http://nextplus.nextmedia.com
|
鍾意就快D Share啦！
|
|
|
