即睇C朗三個入球：https://bit.ly/2JQHmXh
世界盃次日壓軸好戲，西班牙、葡萄牙合演經典入球大戰，雙方打成3:3平手鬥得燦爛，肯定係本屆其中一場最精彩賽事。C朗今仗以個人之力救國，個人獨取3個入波，國際賽入波已去到84球，追平匈牙利球王普斯卡斯紀錄，齊封國際賽入波最多歐洲球員；另外佢亦以33歲之齡，成世盃決賽周大演帽子戲法嘅最年長球員。當全球齊讚C朗係真球王之時，英格蘭名宿舒利亞就唱反調，認為C朗今仗演出只屬一般。
C朗今仗先憑12碼火速打開紀錄，之後佢於上半場後段嚟個中距離埋門，迪基亞派膠輔咗個波入網，造就C朗梅開二度。到完場前C朗主射罰球，右腳射近柱令迪基亞毫無反應，最終完成帽子戲法，西班牙縱然有迪亞高哥斯達入兩粒，加埋拿祖費南迪斯轟入金球，最後亦贏唔到葡萄牙，兩軍各得1分。C朗賽後表示，呢次帽子戲法係佢職業生涯最佳戴帽，而今仗亦係個好戰果，雖然非常難打，但葡軍一直相信自己能力，故值得保持不敗。
今仗C朗射入其第82、83及84個國際賽入球，成功追平經典前鋒普斯卡斯，於1945-1956年嘅入球紀錄，成為國際賽入波最多嘅歐洲球員。普斯卡斯有幾犀利？令國際足協都用佢名字，為年度金球獎命名，就知佢幾有江湖地位，未來C朗於國際足球歷史上嘅地位，將會超越呢位匈牙利球王。另外C朗今仗有波入，亦令佢成為世盃史上，第4位喺4屆世盃入波嘅球員（另外3係比利、高路斯及西德球員施拉）。
但舒利亞就力排眾議，認為C朗今戰冇大家講得咁神：「點解我喺半場時，叫佢練多啲罰球？因為佢於大賽試咗45次，去到今日先射入。另外佢第二個入球，係迪基亞送禮先入到囉。」
即上彩報世盃專頁：http://win.on.cc/football/cup2018/
東網體育同你追實體壇每個精彩時刻！
https://goo.gl/ewVpvE
|
鍾意就快D Share啦！
|
|
|
