藝人黃又南一直堅持與患有腦退化症的父親同住，但近日他向現實低頭，送父親到護理院，交由專業人士代為照顧。他承認忽略了媽媽不辭勞苦照顧病患者的感受，並坦言未能於爸爸有記憶時成家立室，是人生憾事。
家姐「幫手」完心事
2007年，又南公開承認為爸爸擔起約700萬港元的債務，近年黃父確診患腦退化症，又南一直默默承擔。父親節將至，他接受東網專訪，感慨稱與父親相處有何憾事：「諗住27歲還晒債儲多3年錢，搵個女友拍拖結婚，等爸爸見到呢一幕，但事實非我能控制，搞到依家十畫都冇一撇。好彩嘅係兩年前爸爸腦退化初期，家姐已經喺沖繩結婚，相信喺爸爸嘅心中，一定會記得呢個難忘畫面。」
媽媽捱壞身子
今個父親節，又南希望與爸爸同枱食飯的普通心願，卻隨着黃父入住護理院而添「變數」。原來Shine今年3月舉行演唱會前，又南入住酒店方便排練，黃母則留家照顧丈夫，她對兒子一直報喜不報憂，結果累壞了。他泛淚光說：「媽媽嗰次突然見暈，電召救護車送院，佢當時瘦咗好多，我先發覺自己一直只專注患者（黃父），而忽略咗患者身邊嘅人（黃母）。原來媽媽將所有心事，都只講畀我家姐知。我家姐試過提議送走爸爸，每次開聲就鬧大交收場，依家我先明大家都有難言之隱。送爸爸去護理院非我所願，但起碼媽咪有番私人時間，爸爸精神都好咗好多。」
從冇怨父親破產
由於連月忙於工作，又南日前才有時間探望爸爸。談到以往與爸爸的軼事，他說：「以前我會擔心佢唔記得我，但依家我淨係想佢健健康康。其實爸爸好錫我，我細個時佢生意好景，會陪我去旅行，我小學送畀佢嘅父親節卡，佢當寶咁珍藏。當爸爸破咗產要成家人搬嚟同我一齊住，有晚佢好唔開心咁企喺露台，我跟出去同佢傾偈，話我冇怨過佢，而且一直好愛佢。」
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
