陳展鵬去年與母親租住將軍澳一個單位，昨日有周刊報道指，陳展鵬提前退租，並欠租一個月，又指單位內有損壞，地板變黑發霉、冷氣機有釘等問題。陳展鵬昨日現身電視城受訪，拿出多頁證據澄清，現階段一切交由律師處理，更無奈表示：「如果有做過，我雙手跛！」
陳展鵬去年5月以月租3萬元租住將軍澳維景灣畔一個800多呎高層單位，並與陳母同住。昨日有周刊報道陳展鵬被業主控訴，指他提前退租，並欠租一個月、單位內有損壞。通常一般租約為一年生約、一年死約，但陳展鵬向業主提出簽約兩年，並由陳母代簽約。不過今年初，他透過助手向業主投訴，指地板撬起令陳母跌倒。租約理應至19年4月30日才結束，但陳展鵬早前向業主提出，指租約已一年，且該單位不愁沒租客，故他會於5月提前搬走，但業主不同意。
該業主指早前陳展鵬經助手通知，於4月30日已搬走，並將鎖匙交予管理處，再轉交業主，最後業主在管理處和議員陪同下，上門收回單位，並指陳展鵬欠最後一個月租金。業主指陳展鵬遷出後，單位地板變黑發霉，又鑽了入牆架及窗簾掛架，天花又有五元硬幣大的窿，業主怒斥陳展鵬無賴。
陳展鵬昨日身穿古裝戲服接受訪問，並拿出證據作出澄清，他否認業主指控，並謂兩、三個月前已處理好，現階段一切交由律師處理。被追問有關業主的指控，問到陳展鵬簽兩年死約，但一年就完？陳展鵬沒正面回應︰「一定係有問題喺裏面。」陳展鵬嘆工作太忙，所以一直由助手代為處理，他又否認曾用粗口鬧業主。
地板令母受傷
陳展鵬又指入住後屋內有很多問題，講到地板拱起，他拿着照片說道︰「你哋睇吓係我整爛，定係佢自己因為天氣潮濕而拱起，因為啲地板拱起，媽咪受傷，都真係好嚴重。」至於冷氣機有釘，他直言︰「如果我有做過，我雙手跛！我可以咁講！」
陳展鵬繼續解釋指業主曾表示可以拆櫃︰「佢啲櫃係入牆櫃，拆咗啲牆紙全部好污糟，啲牆未髹，我話唔緊要，你拆咗個櫃，我可以畀錢幫你髹番佢。」他續說︰「我畀錢去髹油，又有單有據畀佢，我又點會做呢啲嘢（指欠租），我仲要喺維景灣畔住咗咁多年。」至於最後租金方面，陳展鵬說︰「我交咗但你唔係嗰件事，咁咪出事囉。」他指跟對方表示會將按金變成租金，但對方沒再回覆，他以為已處理好。
應循法律處理
陳展鵬謂應循法律途徑去處理，更怒斥︰「一個月，我絕對可以畀，但係咪我哋藝人知名度高，就可以用呢啲方法去做佢想做到嘅嘢呢。」是否想給業主一個月租來平息事件？他說︰「係，我幕前人，我點唔識都好，都知要履行業主同租客嘅嘢。例如話係租兩年，大家係咪兩年，但一年內有問題，就可以一個月前通知業主，但要畀一個月就可以冇事，並唔係冇交成年租。」
採訪：唐琛悠
|
鍾意就快D Share啦！
|
|
|
