梁漢文（梁炳）年初酒駕惹官非後，前晚再有「黑仔」事發生。昨日凌晨3時多，梁炳在社交網上載其額頭貼了白色紗布、躺在醫院病床的自拍照，原來前晚他相約友人在卡拉OK欣賞世界盃球賽，其間因為叉錯腳仆倒，額頭直撼枱角導致頭破血流，需即時到醫院求診。梁炳昨午已經出院，由於傷口太深，7厘米傷口足足縫了37針，難逃破相。
梁漢文向來是波牛，當然有留意四年一度的全球盛事世界盃。球賽開鑼半個月，16強已經踢了一半，戰況越來越激烈，梁炳早已講明本月中會飛去俄羅斯欣賞決賽賽事，不過，昨日凌晨他忽然在Instagram上載額頭受傷、躺在醫院病床的相片，原來他因為睇世界盃而受傷。
雖然受了傷，但病床上的梁炳仍然不忘更新社交網，貼相後還留言細說自己受傷的經過。他說：「突然心血來潮打畀兄弟問佢喺邊，佢咁啱喺卡拉OK，當時我的感覺直情係緣份到了，可以一齊睇波，點知意外就係意外，冇得解釋，竟然可以一邊唱住人哋想我唱嘅《一世一次戀愛》，個頭直接撞落枱角，流血不止。經過一大輪嘅討論，我決定聽朝做一個大手術，所以我之後會好靚仔good nite，大家不用擔心。」
| | |
傷口深見骨
昨日早上，《蘋果》再聯絡仍然留醫的梁炳，他接受電話訪問時表示：「其實同寫嗰啲字一樣，出去睇波，到半場時，朋友想我唱首歌聽，唱咗幾句，原來前面有一級，咁就仆咗埋去，照咗腦冇乜事，但今朝要做手術。」問梁炳可感自己黑仔？他即講笑說：「呢啲叫做鴻運當頭至啱！」
進行手術後，梁炳昨午已經出院回家休息，他離開醫院時再拍片報平安。坐在病房沙發的他，看來精神不錯，而額頭位中間近髮線位置則貼了一塊白色大紗布。梁炳拍片再講解一次受傷原因，提到今次意外造成的傷口，他表示：「縫咗37針，長度7厘米，深度就係見骨。」
| | | |
照飛睇決賽
據知，梁炳因為希望傷口埋口後「靚啲」，聽取醫院意見後，決定在7厘米長傷口縫上37針。聽來雖然相當恐怖，但梁炳心情似未受影響，拍片時還輕鬆笑謂：「要做嘅嘢都做晒㗎喇，𠵱家只係等埋單，同埋出去食嘢，因為都好肚餓。放心多謝大家關心。」
作為球迷，梁炳早已事先張揚會到俄羅斯欣賞決賽賽事，問梁炳會否因為受傷而改變行程？他表示一定沒有影響，下周五會如期起程，還笑言雖然剛剛出院，但相當精神，他笑謂：「我鬼打都冇咁精神，照舊頂頭槌都仲得，所以13號會照飛去俄羅斯！」
採訪：小米
|
鍾意就快D Share啦！
|
|
|
