大台處境劇《愛•回家之開心速遞》入面有唔少感情線，有人鍾意博思同Mandy，亦有人鍾意大小姐（林淑敏飾）同送水輝（許家傑飾），而後一pair近日又有賺人熱淚嘅表現，甚至令唔少觀眾再次大讚：「今年『最佳女配角』非林淑敏莫屬。」
最近劇情講到大小姐被舅父識穿佢同送水輝嘅關係，於是有意結束同送水輝嘅「初戀男友出租服務」，更送上名為「初戀無限feel之最終回」嘅劇本，希望「小蓮同輝Dee」嘅故事好頭好尾。講真，故事中《天若有情》做BGM一幕好有feel，兩人表情都好俾戲，再加上編劇適時加入一啲搞鬼情節，成件事相當抵死。
講講故事中大小姐嘅表現先，呢頭「鹹魚白菜也好好味」式嘅溫馨甜蜜令大小姐冧樣出晒嚟，嗰頭就教堂眼濕濕勁溫馨，轉個頭被舅父阻住晒擺出一副可憐樣，後來為咗擺平舅父又表現出奸姣一面，到最後對輝Dee真情流露。20分鐘嘅短劇做足幾種感覺、唔同層次，就算今次都仲係唔想俾個「最佳女配角」予大小姐，但都應該好好考慮下俾林淑敏拍正劇啦。
來源 source: http://nextplus.nextmedia.com
|
鍾意就快D Share啦！
|
|
|
