【《蘋果》專訪】近年不少港產片都有濃厚的本土氣息，周四上映、由吳鎮宇主演的電影《逆流大叔》講述一班中年打工仔為保工作賽龍舟，故事亦甚具香港情懷。吳鎮宇早前與導演陳詠燊接受本報專訪，鎮宇力撐本土電影：「冇本土電影就唔會有我。」他直言電影反映香港危機，希望香港人可以同舟共濟︰「大家坐埋同一條船，點都好要撐落去！」
電影《逆流大叔》由吳鎮宇、潘燦良、黃德斌及胡子彤主演，以賽龍舟作主題，在沙田城門河拍攝，城門河賽龍舟是不少港人每年端午節都會見到的場境。日前主角吳鎮宇與導演陳詠燊於尖沙嘴接受《蘋果》專訪，問到陳詠燊為何找鎮宇演出？他說：「鎮宇一向好支持本土電影，當我哋知道鎮宇有機會幫手，就即刻搵監製畀劇本佢睇，佢睇完後就一口答應。」鎮宇說：「冇本土電影就唔會有我，而且呢幾年湧現咗好多新導演，想試吓合作。」鎮宇又稱自己多年來演過好多角色性格深沉陰暗的題材：「當見到有《點五步》同《狂舞派》呢啲咁熱血嘅勵志電影，自己都好有興趣，於是接咗呢套中年勵志片。」他強調為保留電影逼真性，事前故意白紙一張落場︰「因為劇情係講我哋由唔識開始，我想保留嗰種笨笨實實嘅感覺，點知自己真係太笨實，開頭以為拍兩粒鐘，點知第一日喺啲肌肉冇記憶下，已經拍咗十幾個鐘，攰到講唔出聲。」
| | |
再度感受「捱」
鎮宇形容電影是大家捱出來的：「我好耐冇經歷過捱嘅感覺，呢種感覺雖然係好耐冇經歷，但其實又好習慣，會令你記起以前都係咁捱。」除了捱，他更指拍到回春︰「連續十幾個鐘日曬雨淋，呢頭出太陽，轉頭落雨，跟住又出太陽，個人乾完又濕，你諗吓幾耐冇試過畀雨淋，好似𡃁仔。以前細個落街打籃球，落雨都會繼續打嗰種癲狂，真係回春。」
電影中，鎮宇飾演有中年危機的打工仔，他指亦反映香港危機︰「因為香港風華正茂咁耐，𠵱家好似洗盡鉛華，我覺得似香港有中年危機多啲，好多人怨氣重，例如『點解我會咁？』、『點解我要喺呢間公司？』十個人入面，有六、七個都喺度怨，真係有好多負能量。唔通你仲睇《英雄本色》咩？《英雄本色》係我哋最好嘅年代，再畀你睇冇用㗎，唔好講番以前。」
猶如社會縮影
鎮宇說電影有深層意義︰「大家坐埋同一條船，點都好要撐落去。」感受最深的是一條龍舟二十人，來自不同階層，就如社會縮影︰「一個住半山，後面可能住慈雲山，不論你坐巴士或者揸車，總之落得嚟，大家都要出力撐。」
陳詠燊是土生土長香港人，他覺得仍然有很多獨特的文化可以發揮：「龍舟係一樣充滿香港特色又獨特嘅產物，首先龍舟係我哋獨有，扒龍舟更要一班人團結先可以做到。呢個題材冇人拍過，冇得參考，每次拍都要準備三隻船，當你擺好機位，第二隻已經漂走咗，相當花時間。」
採訪：曹家誠
化妝：Kargo Leung
髮型：Joe Kwong
服裝提供：DEGAIA
場地提供：馬哥孛羅香港酒店
|
鍾意就快D Share啦！
|
|
|