陳智燊決定咗……
藝人陳智燊（Jason）今日在社交網站宣布離巢，結束與無綫12年的合作關係。他今日現身書展時坦承跟公司已完約：「因為太多人問，我唔想太多揣測。我都想透過呢個機會多謝樂小姐（樂易玲）、余詠珊同曾勵珍，我未攞過奬，冇得喺台上多謝佢哋，但係有需要多謝，我可以拍到戲同做主持都係因為TVB。」
講到離開原因，Jason稱因爲想作新嘗試，例如拍電影、舞台劇，在內地、新加坡、馬來西亞、甚至英國發展：「尤其事業去到呢個階段要鼓起勇氣去做，我自己又貪玩。（已經有人斟你？）有傾，但未傾成。（係咪改行做YouTuber？）向來有拍，唔需要同做演員分得咁分明，網上好多人都玩，就算荷里活嘅Will Smith都有拍。我同太太都會拍唔同題材。（離巢因爲無獎攞？）唔關事，我都好唔捨得公司，我結婚之後都有諗點去做好自己，好清晰。（有咗BB，所以要賺多啲錢？）未至於有呢個壓力，但係有個動力去做好自己。我個人成熟咗，想畀心機做好啲，做好畀大家睇。（呢個決定做咗幾耐？）個決定唔容易，好似由英國返嚟香港都要唔少勇氣，公司好錫我，畀咗好多機會我，咁多年識咗好多朋友，所以覺得呢個時候做決定係ok。」
至於太太宋熙年，Jason指對方也很支持他的決定，給他很大力量去做好自己，問到太太會否跟他共同進退，不續約無綫？他否認：「佢會繼續喺公司，公司對佢好重要，工作好穩定同舒服，公司又好錫佢，所以我走對佢影響唔大。（你離開自己comfort zone？）唔好睇得太重，要衝同去試新嘢係需要轉換新環境。（公司有冇挽留你？）有傾，我都好唔捨得公司。（有挽留？）有，有同我傾，佢哋個個都有同我傾，樂小姐、余詠珊同曾勵珍都好錫我。我都諗得好詳細，所做決定唔容易。」
來源 source: http://hk.on.cc
|
鍾意就快D Share啦！
|
|
|
