都話有圖真係有真相！拍拖三年一句唔該都冇，余香凝一嘢拗斷陳家樂把「癡心情長劍」，突然玩「中出」中途退出飛起男友，陳家樂有幾Hurt？睇佢幅「癡心情牆」就知！幅牆黐滿昔日兩人又攬又咀嘅合照都唔係焦點，而係佢後尾枕嗰個批盪都甩晒、幾乎連鋼筋都見到嘅窿，我Nuts哥爭啲以為佢搬咗去沙中線紅磡站剪鋼筋月台！呢幅「癡心情牆」唔單止表現出後現代主義同埋對呢個社會嘅控訴，牆灰甩到咁，分分鐘佢晚晚撼頭埋牆，又或者瞓唔着左磨右磨先搞成咁！
分手成個月有多，陳家樂都唔忍心清理佢口中嘅「遺物」，明顯非常唔捨得。講真，扑爛幅牆有幾咁閒，弊在相入面嗰個余香凝難扑吖嘛！話晒諗住娶硬佢，但依家人哋走佬呀，咁多年嘅甜蜜回憶，唔通真係好似幅牆咁，一扑就化為烏有咩！
還是好好過日子
始終都要呼吸食飯返工做人，陳家樂都識得面對現實，實行棄「居」保「帥」，冇話死纏難打！喊還喊，明知冇得掹，都冇話戇居到一天一天等下去，所謂輸人唔輸陣，心都畀你傷咗，大佬，我都要搵食繼續過日子，唔通為咗你一蹶不振？話晒要靠個樣搵食，唔通畀佢一鑊撬起，搞到自己人唔似人、鬼唔似鬼，將捱咗咁多年先有成績嘅事業都搞彎埋咩？
女人變心真係好難搞，加上呢鋪咩都睇清楚晒女方就算肯翻兜，男嘅心理陰影面積大過維園，係咪可以既往不咎，乜都抹走晒先？所以佢索性好心分手，既瀟灑又灑脫，型到裂，帥！佢一直都為女方講好話，直情係好似陳昇首歌咁唱：「把我的悲傷留給自己，你的美麗讓你帶走！」傷心得嚟又冇話喊到天崩地裂，狂數鬧爆，反而祝對方一路幸福好走，真係3至80歲嘅妹妹仔、OL或大媽都加晒同情分
分手先係Good Timing！
雖則網民瘋狂洗版鬧爆女方冇良心，但對啱啱上位嘅家樂而言，分手真係Good Timing！佢寂寂無聞撈咗十年，試過三年零收入逼住過隱青生活，依家事業叫初嘗甘露，三十出頭啱啱滲出男人味，係時候開行Turbo發圍發功！當年同屆新秀兼同公司嘅陳偉霆（William）已經係大中華區「最火男一」，劇酬講緊億億聲，論外形條件家樂都唔輸蝕，雖則林盛斌話齋要追上陳偉霆，暫時連車尾燈影都見唔到，但都要照追，邊個知家樂唔會係第二個William先？
愛情嘅嘢，好似黎明所講嘅同撞鬼一樣，乜都係緣分，點計都計唔到幾時緣盡！所以兒女私情， 就好似佢個「冷凍爺爺」角色一樣，不如放去冷凍室「冰封」十年八載，只要男人吸到金做咗「高富帥」，唔愁冇真愛！到時家樂回首今日，或者會寄張感謝卡畀余香凝，多得佢「分手夠狠」， 呢吓一刀插入佢心，先會逼上梁山成大器呀！
|
鍾意就快D Share啦！
|
|
|
