2018年7月26日 星期四

【壹經典●蔡伯勵離世】長江御用風水師 不為錢但為情出山 __,蔡伯勵,

【壹經典●蔡伯勵離世】長江御用風水師不為錢但為情出山著名堪輿學家蔡伯勵,退休後潛心重新鑄造渾天儀,去年初(2007年)他將首個鑄造成功的渾天儀送給天文 ...


  • 【壹經典●蔡伯勵離世】長江御用風水師 不為錢但為情出山


  • 著名堪輿學家蔡伯勵,退休後潛心重新鑄造渾天儀,去年初(2007年)他將首個鑄造成功的渾天儀送給天文台長林超英,還有兩個正待擇日送中大和港大。渾天儀每個造價數萬元,他造了十多個,但都只送人並不出售,「我都八十七歲,唔係為賺錢囉!」正如他近年半退休,只幫相熟的富豪客人睇風水、山墳,蔡伯勵自言亦不為錢,「你以為幾個(富豪)客人可以養得起我咩?」交情,才令他這個一代宗師最難推卻。

    《通勝》收稿費

    辦公室的書櫃上,擺放光緒年間、有一百二十年歷史,由蔡伯勵祖父蔡最白親手鑄造的渾天儀,蔡伯勵邊珍而重之將渾天儀拿下來給攝影師拍照,邊說道:「而家世界輪流轉,好多人都肯研究呢啲舊嘢,我拎番出嚟只係維持學術咋嘛。」

    想維持的學術不單只渾天儀,還有世代相傳的《通勝》。《通勝》每年出一次、一年達一百萬本銷量,而且通行全世界,蔡伯勵話諗起都好有滿足感。以為百萬銷量,版稅有排計,不過蔡伯勵話不理銷量多少,只收稿費,「我交稿俾你,就收你稿費,點計啫!總之我哋每間每年收十萬稿費。」

    其實除了「廣經堂」及「永經堂」的《通勝》是蔡伯勵編纂外,坊間其餘的都係抄襲,身為版權人的他其實可以追究,但他又隻眼開隻眼閉,「抄襲算數啦,唔理啦,或者叫佢抄得正啲,唔好抄錯,唔好害到人,係咁多。」從廿二歲開始接手家業,至今已六十四年,編纂功夫可謂手到拿來,不過初接手時總有心理壓力,因為背負着「通勝世家」名號,成日想怎樣做得最好:「先父同我講總言之保持三年先執笠,我就冇問題,起碼要守三年,但我守咗六十幾年,哈哈 」初接手時有壓力正常不過,但入行多年,於堪輿界早已是殿堂級的他,對住富豪客人如李嘉誠、恒基主席李兆基、新世界主席鄭裕彤等,他坦言壓力仍很大。「大部分闊佬唔係諗要增加幾多十億財富問題,而係點樣同佢保持呢個財富唔好損失!同埋至緊要平安,保持健康、穩陣去享用呢個財富。」

    雖然有「富豪御用風水師」之號,但他似乎不太受落,更表示自己上、中、下階層客人都有,「邊個請我都可以做,咩為之『御用』呢?佢哋信唔過第二個,係要信我。」又幽默地說:「我哋係服務性行業嘛。」獨善其身近年風水界的是非特別多,罵戰時有發生,一時被指睇錯羅庚、一時又話「呢個未夠班」,身為堪輿界一代宗師的蔡伯勵認為並非可喜現象,「搏出位、嘩眾取寵呢啲梗係唔健康啦,上到電視嘻嘻哈哈,好似好化學咁,正式睇風水嘅嘢唔係咁嘅。」雖然擺明不上電視「嘻哈」,但如果子女上電視講風水,他都無問題,只要講得正確,至怕東拉西扯,「其實我哋都有被邀作學術性的訪問、講座,不過地點是博物館、大學等。」明顯高一班。

    對於新一輩風水師愛包裝自己,傳統派的蔡伯勵卻認為應該,「就算有真功夫,你唔企出嚟邊個知呀?但係咪金玉其外、敗絮其中唔敢講。」而對半途出家的風水師亦採取開明態度,認為無問題,只要肯努力鑽研,必有所成。

    但對於一些「講就誇啦啦」,誇到自稱一個月賺幾十萬,齋吹唔做的風水師,蔡伯勵就話:「嘩!我都冇咁多收入,或者佢有嘅,搵到個闊佬咪有囉!」部分後輩搞到風水界烏煙瘴氣,令蔡伯勵不禁有點欷歔,「行行都有㗎啦,有奸商、有貪官,只有獨善其身 」「真步堂」內擺放了不少蔡伯勵與名人合照,當中包括他與李嘉誠和前特首董建華的照片。

    多傳人蔡伯勵有十一名子女,當中長子爾椿、二子爾德、五子爾威、長女興華和細女青華都隨他學藝,衣鉢由誰來繼承呢?「佢哋個個都可以繼承,『真步堂』出嚟個個都有晒經驗。」蔡伯勵說以前跟祖父和父親學藝,吃盡苦頭,「佢哋好嚴、好嚴,功課做得唔好就成日鬧,依家我梗係唔會咁對仔女哈 」

    不過他的女兒興華就話父親是一個嚴父,「佢好嚴㗎,成日鬧我哋,要我哋記熟口訣。最記得一次爸爸帶我去和合石睇山墳、睇風水,睇完已經日落西山,周圍陰陰森森,行山時我行得慢,爸爸行得好快好快,要追佢,嗰時覺得好恐怖。」在子女面前是一位嚴父,在客人前又要表現嚴肅,但鏡頭後的蔡伯勵卻又有另一面。一頭白髮的他訪問期間說話中氣十足,搬動渾天儀拍攝時身手敏捷,影相時更十分貪靚,不時笑說:「影相我外行㗎,不如教吓我點擺個靚甫士喇。」絕對是個活潑鬼馬的老人家。

    2008年3月13日

    第940期

    相關文章:

    【蔡伯勵離世】今早於養和離世 享年96歲

    http://bit.ly/2v3XKNO

    【蔡伯勵離世】究竟由誰來繼承他的衣缽?

    http://bit.ly/2uSCWJP

    【壹經典●蔡伯勵離世】 蔡興華女承父業 爸爸教路:「做人要溫順啲!」http://bit.ly/2A8Sxu0

    立即下載Apps,隨時隨地睇盡時政專題、深度偵查、娛樂熱話!

    按此連結:http://bit.ly/next28app



    鍾意就快D Share啦!
    Related Posts Plugin for WordPress, Blogger...