獲得一班網民熱烈追捧嘅處境劇愛回家之開心速遞收視一向穩步上揚，集數加完又加、加完再加！好快已經播到第350集，編劇搞搞新意思將兩個最強角色：滕麗名演嘅「大家姐」同林淑敏演嘅「大小姐」擺埋一齊搭出新戲路，睇到觀眾熱血沸騰！當中仲混入好多似層相識嘅電影橋段，緊張得嚟不失搞笑氣氛，幾個分鏡慢鏡更加破天荒咁用落處境劇到！認真揼本。
愛回家除咗一向著重主線發展外，一直會搵嚟其他有潛質嘅新舊演員客串一角，之前有張明偉亂入扮林作，今次搵嚟當年《點解阿sir係阿sir》孖樂瞳演「K4」一齊彈起嘅白淨小生黃得生（Dickson)一人分飾兩角，綁架兩「大」阿姐。飾演精神分裂仲要反串扮女仔一啲都唔容易！好戲之餘佢嘅童顏都係一大亮點。睇嚟大台除咗愛回家要揼本之餘應該要俾多啲角色等綠葉上位喇！多個選擇唔洗下下袁偉豪、陳展鵬咁悶吖嘛。
來源 source: http://nextplus.nextmedia.com
|
鍾意就快D Share啦！
|
|
|
