陳苑澄拍咗條玩高難度動作嘅短片，不過成件事其實好危險！
應屆候選港姐陳苑澄係前組合As One成員，佢講過參選港姐係想挑戰自己，點知佢又真係好鍾意挑戰！尋日佢喺社交網站上載一條短片，片中嘅佢露腰晒腿，原來佢要挑戰「kiki challenge」，落地一邊跳舞，一邊跟住架行駛中嘅私家車。
首先佢對住鏡頭扮可愛，然後就扭身扭勢落車，而車上嘅司機位就Set咗攝錄機，佢落地之後，架車繼續慢駛，攝錄機就影住佢喺行人道上跟住車速跳舞，期間佢又伸手入車廂攞彩帶，繼續無視途人表演絲帶舞，跳完一輪後，佢突然好急咁衝上一直行駛中嘅私家車，再對鏡頭扮可愛。雖然成個表演好高難度，不過網民就一面倒對佢呢個行為表示反感，有唔少網民仲用粗口留言鬧佢，問佢為博見報可以去到幾盡？網民留言：「扮可愛定係真低能？」更有網民話佢呢個行為危害其他途人，簡直不知所謂！
藝人何浩文曾經喺社交網發文指大家根本唔應該跟風去拍片挑戰！佢話：「kiki challenge完全唔應該玩，尤其係藝人，唔係潮流就一定要跟，要玩都唔一定要玩危險嘢，以為玩完自己冇事就OK，有冇諗過會唔會影響到啲年輕人，有人發生意外你就變成殺左（咗）佢嘅一份子 #之前外國興自殺又唔見你哋自殺 #各位藝人用吓腦好嘛」
來源 source: http://hk.on.cc
|
鍾意就快D Share啦！
|
|
|
