29歲「鴨王」何浩文（Dominic）11年同「糖妹」黃山怡分手後，15年底被讀者透過《蘋果》「爆相爆片」，分享鴨王偕新歡蜜遊台北撐枱腳，Dominic新女同糖妹好似，不過身形較高，被封「高版糖妹」，原來「高版糖妹」係空姐，叫唐紫瓊（Candy）（相關新聞： https://bit.ly/2KKWfKk ）。佢哋拍拖後，Dominic成日喺社交網放閃。
今年3月有報道Dominic同空姐Candy分手，佢哋社交網都取消埋互相關注。日前有讀者爆料指Dominic同空姐Candy分手前幾個月，佢哋仲同埋曾去ViuTV選美節目《美選D.n.A》面試嘅0靚模方敏婷（Natalie）一齊玩，仲話兩女都係好友，但Dominic同空姐Candy分開，即被揭搭上Natalie。有指Natalie同Dominic都係王晶旗下，可謂近水樓台。估唔到佢哋撻着後，又伴去泰國預支蜜月，愛得高調。
有讀者報料指Natalie係第三者，Dominic今日回覆《蘋果》時話：「又有人報料，我同Candy分咗好耐喇，2月分咗啦，冇咩特別啦，純粹互相了解過後分手，所有嘢都自自然然，隨住人生流動冇第三者啦，好多時一分手啲花生友就希望做個第三者出嚟食花生，甚至有啲人會希望有個第三者出現令分手嘅原因，唔係出於自身問題。」
Dominic冇否認唔係同Natalie，佢話：「冇話追呀，剩呀，年頭拍完劇，返到香港，工作見多咗面，慢慢越來越熟，有時人會喺有啲時候遇到個相處得好舒服嘅人嘅，同Natalie都覺得好舒服。」但始終Dominic避談幾時開始同Natalie一齊。Dominic話自己每次拍拖，都視拍拖對象係結婚大前提：「如果我結婚唔想離呀，我結得婚就應該真係一世㗎喇，家庭好重要㗎！我好少唔係希望可以結婚為前題嘅，又如果我80歲命，都過晒人生三分一，都想有個人適合，穩穩定定陪埋我之後嘅人生。」
Dominic好似好有計劃，咁打算幾時結婚？佢大講爛gag：「買到樓就結！買唔到樓都結！不過結紮。」佢始終覺得買到樓會穩定啲，佢話：「有咩都有啲嘢揸手。」佢仲話會加油同努力。
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
