公認是「靚聲王」的張偉文，聲音溫柔醇厚。人如其聲，張偉文為人不慍不火，也許因為不夠火，令人懷疑他是同性戀。張偉文日前接受《蘋果》專訪，直言年輕時有同志向他示愛，但他都會避之則吉。罕談感情的他自爆有過四段短暫情緣，可惜全都無疾而終，多年來張偉文都心繫初戀女友，女方更曾為他懷孕，可惜伊人遠走他鄉，如今芳蹤杳杳。年屆64歲的他，唯一心結就是希望可以尋回骨肉，重拾親情。
撰文︰祖李
攝影︰陳俊強
憑着醇厚且溫柔的聲線，在樂壇唱足四十年的張偉文，最近忙於籌備本月初開始舉行的「沿途有你」演唱會。僅六場的個唱開足兩個月，至下月尾才正式完結，皆因張偉文自前年做完兩次腰椎手術後，行動不便，出入需以電動輪椅代步，即使站立十分鐘也覺得相當疲累，所以每場演唱會都會相隔數天至數周舉行。演唱會亦會有好友胡美儀、麗莎及譚錫禧等助陣，不只為帶來火花，也分擔踏台板時間，減輕張偉文負擔。
原本是肥仔的張偉文，在16年被傳媒拍到暴瘦百多磅，其實當時他已做過一次手術。近三年張偉文已做過兩次大型手術，他坦言經歷過死亡一刻，在推出手術室時，更以為自己彌留︰「咁短時間做兩次手術，對手術失晒信心，有種恐懼，會問自己究竟今次出唔出到院。唔係怕死，只係未ready死亡，做大手術，要成十二、三個鐘。雖然我不嬲係無神論，但醒咗之後蒙查查，見到兩邊有人抬住我，我心諗，原來世界真係有天堂，見到啲光管白雪雪、啲人又戴咗白帽，感覺好浮，後來麻醉師當頭棒喝『你未死，啱啱做完手術咋。』我至知自己大步檻過。」
性生活不協調
抱病在床的日子，難免寂寞。不過，張偉文卻說現在已習慣獨身，不會奢望愛情再降臨，他形容自己情路崎嶇，十五年內的四段情緣都無疾而終。他覺得女人很難捉摸，尤其性方面更難協調︰「未夠20歲開始到35歲，我曾經有四段緣份，但次次都冇結果，因為年少氣盛，我又執着，很容易衝撞對方，咁就散囉。尤其住埋一齊生活，最長都只係個幾月。因為有性有愛嘅生活同單身好唔同，男仔喺性愛方面會主動啲，你想要，梗係模手摸腳，但佢又唔鍾意，性呢方面好麻煩。」
張偉文覺得男女關係，做朋友比做夫妻容易，原來第一任女友曾懷有他的骨肉，卻選擇不辭而別。說起這段情，他大感無奈︰「佢有咗身孕就走咗去，有冇生我唔知，只係留低張紙，話有咗四個月，喺香港落（墮胎）好危險，所以要去外國。我覺得係借口，佢應該只係想搵個地方生個小朋友出嚟，可能因為當時我好窮，佢唔想嫁畀我。兩年後我再撞番佢，約佢去茶餐廳見面，打算問佢呢件事，但我等到打烊佢都冇嚟，之後我再冇見到佢。」
| | 張偉文03年復出幕前，05年曾舉辦演唱會，當時他身形豐腴。資料圖片 | 去年張偉文身體未完全恢復，但仍現身支持好友呂珊的演唱會。資料圖片 |
同性三角情仇
當年張偉文在酒店廚房學師，收入不高，一個月只有120元收入，為了愛情，他以50元在尖沙嘴租住一個房間，與女朋友展開同居生活：「不過一齊住之後，可能係因為我堅持或者佢固執，大家拗撬越嚟越多。其實佢點樣處置個BB，我都控制唔到，如果佢真係生落嚟，我好想要番，我會負責㗎。因為我其實好鍾意佢，我第一次都畀咗佢。佢唱歌又叻，尤其係黃梅調，我哋有共同嗜好，把聲啱key又夾，所以佢走我都好唔捨得，由始至終，我都唔知佢點解離開我，覺得好可惜。我知道佢𠵱家喺美國或者加拿大生活，但唔知地址。」
其實張偉文與初戀女友開始，亦牽扯到一位他由小玩到大的同性好友，更演變出一段三角情仇︰「我初戀女友最初係鍾意我一個稱兄道弟、由細識到大嘅老死，突然有日佢（初戀女友）同我講，話個兄弟鍾意我，我就解釋我哋只係兄弟情，叫佢唔好搞錯，但佢話係個男仔親口承認，當時我好愕然、氣憤，不停解釋。但諗諗吓又覺得個兄弟有時對我嘅眼光，真係有啲唔尋常，咁我為咗證明我係直，我仲捉住佢隻手摸我下體，同佢講『係咪呢！我都話我係得嘅。』當時做酒店啲人係咁癲、咁開放，我哋就係咁樣開始咗。可能佢唔夠鍾意我，因為佢都係因為發現我兄弟係同志先至轉軚同我發展。」至於女子是否報復他，張偉文無奈說︰「如果係咁佢贏咗，因為我真係受傷。」經此一役，不只戀情不再，兄弟情也不再。
之後張偉文拍過三次拖，但亦不能適應對方的想法，他說︰「第二個女朋友好古板，乜都要問過父母！其實佢都成年，只係細我一歲。至於第三個，佢同我同年，但就成日話覺得會快老過我，好冇安全感，到最後都係散。」張偉文說一生姻緣運普通，他直說︰「33歲後再冇遇過，因為我鍾意靚女，靚女首要條件係後生。咁我當時都三十幾歲，後生女都唔鍾意我，𠵱家我身體仲咁樣，更加唔諗啦。」
弟妹自小失散
自幼喪父的張偉文，母親一人難以撫養四個兒女，惟有留下長子張偉文，其他孩子都要送給人養，張偉文與其他三弟妹，也是長大後才重逢，但長時間分隔，感情疏離。年輕時代，張偉文待人很熱情，但娛樂圈損友不少，黐飲黐食的人、借錢唔還的人亦有不少，令他越來越覺得要與人保持距離，君子之交淡如水。就算抱病，他都寧願選擇一個人承受︰「我不會同人講我病，尤其親人及同你感情好嘅人，因為我唔識點回報，我好怕欠人，到人哋需要你幫助時，你又無能為力，咁就唔好啦。人與人點都要有距離，去到好知心，我會驚。30歲前，我好多所謂死黨，以為你賺好多，會問你借天文數字，從此之後，我唔想再知人哋咁多嘢。」張偉文現在唯一的心結，就是有生之年尋回自己的骨肉，重拾失落了的親情。
|
鍾意就快D Share啦！
|
|
|