藝人周勵淇原來愛拍喜劇，早前與甄子丹拍攝動作喜劇時大過戲癮，扮醜的她更嫌不夠醜，喜歡沒有角色設定，任意發揮！現實中，她也喜歡沒有設定的戀愛，更接受先婚後戀愛，覺得人生並非只單一方向走。
周勵淇（Niki）已經是第二次改名，原名周麗琪，後改名周麗淇，現再改為周勵淇。三個字，形變聲不變，名字變了，她也改變不少。現年39歲，沒拍拖，被列入黃金盛女，對於脫單，她像變了另一個人似的：「眼見好多人識咗一個禮拜覺得好好，兩個禮拜就結婚，一個月搞掂所有嘢，圈中好多人係咁，幾開心呀！子丹哥（甄子丹）同汪詩詩都係咁，幾好呀！結咗婚先拍拖，或者生咗小朋友先拍囉，以前自己唔係咁諗，依家覺得未嘗係唔好。（因之前感情觸礁？）唔係，人係咁，見人咁覺得幾好，當然唔係自己一定係咁，但唔係唔可以囉，唔一定識一、兩年先結婚，可以試吓呢個方法。」
唔信一見鍾情
Niki揚言單身沒任何包袱，反而擔心太習慣單身，他日有人管的時候會不習慣。又覺得感情冇得急，一直抱隨緣心態，只是身邊的朋友替她擔心，不時介紹筍盤，她帶點不好意思說：「食個飯冇問題，感覺唔啱就唔啱。（第一眼就知啱唔啱？）咁又唔係，朋友慢慢發展都有，我唔相信一見鍾情。」
剛與甄子丹拍畢電影《肥龍過江》，對於飾演脾氣暴躁的女友，與子丹鬧出很多笑話，她感覺好好玩，笑言：「我都幾有喜劇細胞，唔係個人搞笑，係自己唔怕核突、唔怕醜，啲人會覺得你呢個人幾好笑，觀眾笑嘅位唔係因為你搞笑，好笑在覺得你夠膽咁講嘢，我喺戲入面，行為好笑、好投入，完全唔顧儀態。我覺得啲人會欣賞冇咁多包袱嘅人，呢個角色好冇儀態、好巴渣，我覺得唔夠添！可以再激啲。」
掘金愛買樓
電影後，Niki又回歸內地劇，一拍又要離港三、四個月，她坦言在內地發展這三年好幸運：「一個演員去到一個地方，由啲人唔識你，到欣賞你作品，對我嚟講最幸福。（三年賺到幾桶金？）又唔係，可以生活到，可以投資吓，畀自己生活好啲，我淨係識買樓，啱我普通婦孺。（幾多物業？）五隻手指數得晒，唔想講太多，媽咪教落，做人要低調。」
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
