哈佛知識分享：「搵錢、結婚、生仔」點做得更開心？
而家喺星加坡同我老婆同三個女，趁開學前放下放假。我相信冇人會反對人生其中一個最開心嘅時候就係同屋企人放假去旅行嘅時候。
包括我在內，我相信好多阿媽都同阿仔講，大個咗要搵到錢，大個咗要結婚，大個咗要生小朋友建立家庭。 即是唔係咁講，都肯定唔會講大個仔要窮，記住成世要孤單一個人，唔好結婚同有仔女，種下禍根。
咁其實我阿媽、同你阿媽講嘅嘢啱唔啱呢？有冇科學根據？錢能唔能夠買到快樂？結咗婚係咪真係會開心啲？生咗仔女咁又點呢？根據哈佛心理學教授 Daniel Gilbert 過去30年嘅研究，佢話阿媽以上三大智慧係啱啲唔啱啲。而家同你逐一講講。
今個月我剛剛就去咗佢喺哈佛講「Happiness（開心）」嘅一課，循例我好鍾意坐第一行，佢無話唔俾影，個個學生喺咁影相，我又唔係學者，我只係一個專賣鋪嘅生意佬都同你分享下我學咗啲乜。
第一：阿媽話，大個仔要搵到錢。咁錢係咪越多，會令你越開心呢？ 答案，yes！真係，越多就越開心。Never go back down！邊個扮清高，話錢買唔到happiness係錯晒。有錢人就係開心過窮人。不過根據哈佛教授Daniel Gilbert 指出，錢喺大約去道每年六萬蚊美金嘅收入，即係每個月三萬九千蚊港幣，你就大約已經買到95%嘅happiness。 諗真啲，每個月三萬九千蚊港幣，其實真係唔係太多。當然世界每個地方嘅生活水平唔同，但個idea 就係如果你要再開心啲，更加多嘅收入其實如果你同樣嘅洗法都只係畀多你人生5%嘅開心。
咁點樣洗法先能夠更加開心呢？
1. 買多啲經歷，買少啲嘢。因為經歷，例如去旅行，每個人係獨特嘅，無得比較。但如果你買咗架法拉利，見到側邊嗰人揸住架林寶堅尼，你就覺得點解佢架車仲靚過你。
2. 洗多啲喺人哋身上，洗少啲喺自己度。點解有錢佬好鍾意捐錢，因為幫人都係一種滿足感。
3. 放多啲錢係關係上，有人同你分享，遠遠開心過自己一個獨食。信不信由你，我幫到個租客做生意，我都真係好開心。佢賺多一萬，遠遠開心過我自己袋晒。
開心嘅程度，由低至高依次為「工作」、「揸車搭車去上班嘅時間」，同埋「睇電視」。好多人話有錢之後就「攤喺度」乜都唔做，但其實「攤喺度」開心嘅程度，同work都差唔多。 咁乜嘢係最開心呢？ 教授話係「talk and sex」。你明啦，我諗唔使翻譯。 佢話，所以如果你有錢嘅話唔應該休息多啲，係應該多啲「talk while having sex」。真係佢話㗎，今晚試試。
第二， 結咗婚係咪真係開心啲呢？ 呢個我有些少利益衝突，即使唔係，我都唔可以講大聲。但研究指出，答案又真係，係喎。過去嘅50年嘅研究指出，結咗婚嘅人就係開心過未結婚嘅人。再細緻啲睇，結咗婚嘅人就係開心過同居嘅人，同單身嘅人。離咗婚或者分開咗嘅就最唔開心。
但結唔結婚，隨著歲數都好影響開心程度。佢哋全部都係二、三十歲嘅時候最開心，去到四、五十歲就中年危機，七、八十歲嘅時候又回覆童真。但留意喎，四、五十歲未結婚嘅人係最唔開心，因為一世人入面唔知最終結唔結到。去到六、七、八十歲呢就認命，開心返啦。
但記住喎，以上嘅圖雖然結咗婚嘅人係開心啲。你要搞清楚，係因為佢結婚而開心，定係因為佢本身係個開心嘅人而吸引多啲人想同佢結婚呢？Correlation（相關）唔等於 Causation （因果關係）。教授話你要搞清楚個關係喎，佢都未有答案。
佢只係知道結咗婚嘅人，都唔係一直開心㗎喎。結婚之後嗰一兩年係最甜蜜嘅之後就一般啦。 我結咗婚13年啦，都細細聲同你講唔會相差太遠。但離婚呢？男人？離婚前一年就最悲哀，之後就一支箭咁標上去。女人就反而比較平穩啲喎。我諗男人最明點解
第三， 睇完錢同老婆，睇下生仔女啦。「Kids are pain in the ass（孩子是討厭鬼）」呢句話我諗好多父母都會贊成。原來阿媽話結婚一定要生仔女先至開心，呢個係錯㗎喎。唔怪得知，我最開心嘅旅行，通常都係同我老婆兩個人去嘅旅行。
教授Daniel Gilbert 話「non parent（非父母）」，一般係開心過「parents（父母）」，更開心過「parents with minor children」，即係有細個嘅小朋友，即係我呢啲，係最唔開心。佢話研究數據指出，小朋友出世頭幾年係會令你越嚟越唔開心。 諗真啲，又啱喎。 啱啱出嚟嘅時候，成嚿飯咁，同佢玩乜都得。 篤下佢，彈下佢，冇問題。之後又要playgroup，又要諗幼稚園，又要諗小一入學，真係想死。我最近先至成日煩緊我細女要去小一入學面試。小一入學嘅壓力係遠遠大過自己去大學或者求職面試。當年見傑青個評審我都冇咁大壓力。
數據指出作為父母，最開心係同朋友傾計，第二係享受美食，第三係超市買餸，第四係做家務，咁同細路一齊呢？只係高過做家務少少。
全世界嚟講，平均都係無細路係開心過有細路....只係少少。結咗婚嘅就好啲，但整體上都係無細路開心少少。如果你係單身嘅，你就更加唔開心。離咗婚嘅， 係最唔開心。因為大家都明白，離婚最難搞嘅就係仔女。反而寡婦/寡佬就遠遠最開心，因為始終老公或者老婆走咗之後，仔女可能就係佢哋唯一嘅伴。
雖然全世界整體上都係無細路開心過有細路，但每個國家都有所唔同。美國呢就係比全世界好啲，黑山共和國就係最好，馬其頓就係最差。香港我就無數據，我估應該好啲嘅，始終有工人姐姐幫手。 但一講起小一入學，我諗個個父母就會話我哋同馬其頓差唔多。
總結，點都好，有細路係開心嘅，不過唔好為佢哋而煩惱太多，我成日同我老婆講育兒第一守則——Relax（放鬆）！
結婚？ 好吖，「only if you find the one you love and he or she loves you too」。「Love（愛）」唔同「Like（喜歡）」喎。 「Like」係想「得到」，「Love」就要「付出」。唔好為結婚而結婚。
最後，錢可以令你開心啲，但如果你能夠買多啲經歷，洗多啲喺人哋身上，同埋建立關係上面呢，你會更加開心。
撰文：李根興
立即按此連結下載APP：http://bit.ly/next28app
來源 source: http://nextplus.nextmedia.com
|
鍾意就快D Share啦！
|
|
|