莫家淦慳出黃金路$3,000人工滾出6間舖
要闖出一片天，未必要靠父幹！由有線過檔無綫的藝人莫家淦，憑獨特「財技」慳出個未來，由零開始，由底薪得3,000蚊，捱到今日成為六間手錶店及眼鏡店的老闆，升呢「莫董」！
和陳貝兒、陸浩明、衛志豪及黃翠如等由有線娛樂台過檔無綫的藝人莫家淦，除了繼續司儀及主持工作外，近年更參與拍劇。禾稈冚珍珠的他，更是商場才俊，現今已是六間手錶店及眼鏡店的老闆，難怪他有花名叫「莫董」！
三餐帶飯日花100蚊
日前本報發現他於旺角現身，原來他一口氣租入兩個相連舖位開設手錶店及眼鏡店，當日巡視業務的他雖然貴為老闆，但全程冇架子，和員工有說有笑，更化身店員，踎低起身幫忙執貨及清潔舖面，有客人時亦主動上前介紹產品。期間他更於社交網開直播，做「人肉Model」試勻新款眼鏡，出盡法寶吸客。
「上車難、創業難、不靠父幹冇出頭天」成為時下不少港人的心聲，現年36歲的莫家淦卻認為「有呼吸就有希望」，肯慳肯捱哪怕冇出頭天！2004年加入有線做娛樂主播，一做7年，他接受本報訪問時說初入行的底薪約有3,000蚊：「要靠外快幫補，話晒人工唔高，真係要慳住使同儲錢！少買衫少去旅行，出騷都係問贊助商借衫，當時我盡量限住每日只使100蚊，一日三餐盡量帶飯盒，超市每日黃昏後係特價時段，去買餸最啱！」
多得老婆陪佢捱
不少港男窮一生尋覓甘為自己捱快餐的女人，而莫家淦死慳死抵，多得當時的女友、現為太太的Kenix無限支持，他說：「拍拖都係經濟實惠為主，當然都會睇戲食飯，但唔會咁多！我都儲咗4、5年錢先擺到酒，結婚相都係喺香港影就算。」
問到當年有傳他給開門利是僅200大元？他說：「哈！搞氣氛啫！當日即刻補番晒畀啲姊妹，娶老婆咁大件事，呢啲嘢點會慳！其實結婚之後，都冇送過咩名貴禮物畀老婆，有錢都留畀個仔，所以真係好感激老婆陪我捱，為我犧牲咁多。」
親力親為變鐵人
節衣縮食多年，慳出了第一桶金，他於2011年以六位數字和友人合資成立眼鏡品牌，7年來已開到第四間分店，品牌更成為潮牌，不少天王巨星包括郭富城、容祖兒及陳奕迅等都熱捧，近年品牌更衝出香港，業務擴展至馬來西亞。至2015年又創立手錶品牌，現有兩間分店。所謂力不到不為財，手錶、眼鏡生意雖然不錯，他仍堅持親力親為，像最近他推出新歌《無可替代》，同時要拍劇及做主持，忙到變「鐵人」：「早排真係忙到有48個鐘冇瞓過，仲要劇組、舖頭兩邊走，開頭做生意時更加忙到足足半年冇假放。」
|
鍾意就快D Share啦！
|
|
|
