現年48歲嘅鄭嘉穎8月同拍拖三年嘅27歲港姐陳凱琳喺峇里結婚，咁好多新婚夫婦喺外地註冊結婚之後，返到香港都會補辦手續，噚日《蘋果》就發現鄭生鄭太已經遞交咗「擬結婚通知書」，之不過佢哋報住嘅地址就唔一樣，嘉穎就報大角咀，而Grace就報住婚前同爸爸媽媽一齊住嘅九龍塘大宅，照計佢哋婚後已經一齊住，咁填兩個唔同地址，應該係唔想新居曝光。
行事低調
其實鄭嘉穎一向低調，當日佢選擇峇里舉行婚禮都係貪當地私隱度高。而婚禮宴請嘅賓客亦係同嘉穎好相熟嘅圈中好友。佢哋事前個個都守口如瓶，唔敢透露半句婚期、地點同細節，可見鄭嘉穎保密功夫真係做足。
而最近另一對娛樂圈新人陳展鵬同單文柔，亦因為之前遞交「擬結婚通知書」，令佢哋同居關係曝光。佢哋宣佈下個禮拜六先擺酒，不過之前佢哋交「擬結婚通知書」時就報咗同一個地址。不過，問番展鵬同女友係咪同居試婚時，佢就避重就輕話︰「𠵱家乜嘢年代呀？呢個係幾好嘅題材，將來可以攞嚟拍，我哋𠵱家好舒服、好自然，大家唔好聯想太多嘢……我冇留意呢單新聞喎，不過只係一個地址，用嚟登記啫。」
撰文：馮仁昭
|
鍾意就快D Share啦！
|
|
|
