年輕時衰爛賭，喺麻雀館打到天昏地暗，個仔發高燒佢唔理。前妻鬧得佢好啱，「連頭家都輸埋」，搞到骨肉分離，的確係「一個人累全家」。大仔最慘，捱生捱死賺錢幫老竇還債，但老竇死性不改，搞到大耳窿追數燒到個仔重傷。最後先識喊，話要斬手戒賭，仲嚟唔嚟得切？不過呢個只係《跳躍生命線》嘅卓裘。
現實中，昌哥李成昌，同卓裘相反：「其實我小男人，好顧家，好錫老婆好錫女。我會煮飯，我會洗碗，我無請菲傭，我請鐘點，有時阿姐嚟唔到我都會吸下塵抹下嘢，我亦都會洗衫、晾衫、收衫。」
老婆話佢縱壞個女。昌哥否認，但身體很誠實。「個女細個想釘耳窿，我哋唔俾佢整，但私下又同老婆商量：『俾佢啦，耳窿仔無咩所謂嘅。』之後氹阿女出去旺角行街，行到間釘耳窿嘅舖：『你做咩呀？入去囉。（入去做咩呀？）釘耳窿囉。』嘩！開心到個女。」
個女鍾意《哈利波特》，甚至憧憬戲中嘅英式堡壘校園。於是3年前，昌哥送埋個女過去：「我話：『嗱你乖，因為爸爸媽媽送你過去都好辛苦架，你首先要乖，你讀書唔一定要最叻嗰個，但起碼要俾心機讀書先，同埋一定要做個好人。』如果呢段時間我個女想去，我有能力但又唔俾佢去呢，反而日後可能係個遺憾。俾到嘅話俾佢去，我辛苦啲囉，佢又開心嘅。」
難道昌哥唔縱老婆？不過佢真係連花都唔肯送一次。「花我唔送，我老婆都成日話我架。我就梗係唔送花啦，好老實，錢嚟架嘛！咁笨嘅大佬，幾百蚊，而家愈來愈貴添喎。」
氹老婆，幾百蚊紮花都唔願買，佢改送 「我老婆有時話想買啲咩嘢，我話：『買咩吖買，貴，唔值！』比如話錶，十幾萬一隻錶，『我架車都係十幾萬咋老婆，唔好唔好！』又係喇，我話出去尖沙咀行下啦，行下行下就帶咗佢入去錶舖。同個女嗰招一樣，咁就入去睇。『睇咩？』『睇錶囉。』咁就整咗隻錶俾佢。第2次唔用得架喇，第二次直程話『唔買，又買！』跟住失驚無神過咗筆數俾佢，佢話：『做咩呀？』『買錶吖嘛。』
「我覺得女士，如果佢鐘意嘅，我懢都懢多啲囉。」
昌哥講完呢一句，應該好多男士將會聽到另一句：「好心你學吓人哋」兩個月後12月，再兩個月就2月，睇路呀！
採訪：梁子健
攝錄：黃志明、吳斯金
來源 source: http://nextplus.nextmedia.com
|
鍾意就快D Share啦！
|
|
|
